Esta campaña dexa n’evidencia la falta de voluntá del “Principado” de respetar el Plan Forestal (agora mesmo la superficie d’ocalitales supera la prevista pal añu 2060), y el “posturéu” d’IU y Podemos, que declarándose contraries a esti monocultivu, nun fain un res onde cunten con poder políticu pa ello.
Ente la iniciativa llanzada por ENCE pa favorecer la renovación de las mases d’ocalitos de más de treinta años con una campaña qu’inclui bonificaciones nel preciu la maera y regalu de llantones, Andecha Astur denuncia qu’ello nun ye más qu’una estratexa pa continuar espardiendo esi monocultivu, una vegada que ya se superaron les cifres previstes nel Plan Forestal, rexistrándose nesti momentu la superficie prevista pal añu 2.060.
El fechu mesmu que dende’l “Principado” y los partíos de la Xunta Xeneral nun faigan cumplir el Plan Forestal, y se permita la puesta en marcha d’esti plan amuesa, per un llau, fasta qué puntu se plieguen a los porgüeyos de la papelera, y pel otru, lo valero de les declaraciones de dalgunos grupos, comu IX o Podemos, que pesia declarase públicamente contrarios al ocalitu, nun tomen midíes pa frenar estos llantíos, nin a nivel d’Asturies onde vienen d’apreba-y los presupuestos a Javier Fernández, nin a nivel de Conceyu onde nun apreben –ellí onde tienen mayoríes pa ello- les Ordenances de Conceyu precises pa torgar los ocalitales.
Andecha Astur desixe que se faiga respetar el Plan Forestal, y la inmediata puesta en marcha de lleis asturianes que frenen esta invasión, asina como les debíes ordenances de conceyu que protexan los nuesos montes, afalando la recuperanza de les especies autóctones y desaniciando los ocalitales.
Los ocalitos son una especie invasiva, foriata, que multiplica bultablemente’l riesgu de quemes, escosa la tierra, nun apurre’l necesariu abellugu y alimentu a la fauna y flora, robando recursos a les especies autóctones. Amás, l’ocalital, como tou monocultivu, introduzmos nuna política económica tercermundista de dependencia y esplotación del mediu de forma non caltenible, ensin ser tampocu la opción más rentable d’ente los posibles aprofitamientos económicos del monte asturianu.
