El Gobiernu español discrimina a los trabayaores temporales y permite la esplotación d’empresarios y ETTs con esta triba contratos.
Les entrugues foron presentaes nel Congresu de los Diputaos español por Oskar Matute, diputáu d’EH Bildu –organización coalligada con Andecha Astur a nivel européu-, y con elles pretende iguase la inxusta discriminación llaboral que carecen los trabayaores con contratos inferiores a cindo díis de duración respeutu d’un trabayaor con contratu indefiníu qu se produz tantu nel cálculu que fai la Seguranza Social pa obtener los Topes de Cotizacion diarios, como’l periodu de cotización reconocíu na vida llaboral.
Al aplicar la Llei Xeneral de la Seguranza Social a estos dos conceutos, al trabayador con contratu diariu, ignórase-y la parte proporcional de descansos, festivos y vacancies; lo que fai que, pa tener drechu a les mesmes prestaciones qu’un trabayador fixu nel subsidiu de desemplegu, xubilación, etc., tien que trabayar rialmente los 365 díis del añu, mentes que’l trabayador fixu, les mesmes prestaciones algámales trabayando rialmente namás 224 díis al añu.
Nel preámbulu del Rial Decreto Llei 28/2018 de 28 d’avientu, el Gobiernu pretende “lluchar escontra l’empléu precariu y más concretamente escontra l’abusu na cellebración de contratos temporales de curtia duración”, pero les midíes recoyíes nesti RDL son bien escases ya inferiores a les yá reconocíes pol Tribunal Supremu en Sentencies de la Sala 4ª de fecha 17 d’avientu de 2009 y 22 d’abril de 2010, nes que l’altu tribunal establez el criteriu de que nos contratos inferiores a cinco díis, el Períodu de Cotización a la Seguranza Social tien d’incluyir tamién, amás de los díis bramente trabayaos, la parte proporcional de los descansos si se cotizó pola so remuneración, too ello dixebradamente de la triba de contratu que seya (fixu discontinuu, d’obra o serviciu determináu, etc. Atalantando que: “La espresión ‘períodos d’ocupación cotizao’ qu’emplega’l tan citáu Art. 210.1 de la LGSS nun pue interpretase nun sentíu tan restrictivu que resulte equivalente a díis efeutivamente trabayaos (…)”.
-P’ANDECHA ÁSTUR, con esti cobarde cambiu de la Llei Xeneral de la Seguranza Social, el Gobiernu español nun gueta solucionar la inxusticia que carecen los trabayaores en cuantes al cálculu de les sos cotizaciones, nin acabar cola gran esplotación d’empresarios y ETTs con esti tipu de contratos temporales, sinón que -hipócritamente- el Gobiernu español lo que busca ye namá ameyorar un pocu la deficitaria recaldación de la Seguranza Social y engañar a los trabayaores presentándolo como que ye para beneficiu del trabayaor eventual.
