Mentes el “Principado” y los alcaldes de Xixón Avilés, Sieru, Mieres y Llangréu avancen nel Ária Metropolitana, n’Aguanes –Allande- el desdexamientu llega a que los neños nun cunten con tresporte escolar
Ayeri, el gobiernu del “Principado” y los alcaldes de Xixón, Avilés, Sieru, Mieres y Llangréu firmaben el Conveniu Marcu de Collaboración del Ária Central Metropolitana que representa un proyeutu d’aldegona central arrodiada d’un parque temáticu ermu, dedicáu al turismu. Metantu, Andecha Astur visitaba nel so llar d’Aguanes –Allande, a Sureyna Muñiz, una de les víctimes d’esta política de redistribución territorial de la población asturiana.
Sureyna Muñiz vive na aldega d’Aguanes (a unos 40 km de La Puela, Allande) y tien una fía de 9 años. Ellí tamién vive otra familia con dos fíos, de 5 y 8 años. Los tres neños va a escuela a Berducedo. Dando cumplimientu al drechu que tienen de disponer d’un tresporte escolar, la Conseyería d’Educación y Ciencia sacó a llicitación pública la ruta escolar Aguanes-Berducedo, pero quedó erma porque denguna empresa quinxo asumila. ¿Por qué?
Porque la ruta dende Berducedo fasta Robledo pue facese per carreteres asfaltaes, pero los seyes kilómetros qu’hai ente Robledo y Aguanes son de pista de montaña y tán nun estáu llamentable, faciendo que’l recorríu d’esa pequeña distancia seya un riesgu claru y sólo valible pa vehículos 4×4. Ye imposible qu’un coche de los que normalmente se contraten pal tresporte escolar d’unos pocos neños pueda viaxar ente Robledo y Aguanes.
La pista ye importante porque permite l’acesu a cuatru aldegues (A Cova, Rubieiro, A Furada y Aguanes, dos d’elles entá habitaes). Tamién ye l’acesu al monte d’utilidá pública Sierra El Valledor, siendo emplegá pal desenrollu d’actividaes agrícoles, ganaderes, forestales y cinexétiques, pal repartu de corréu postal públicu y priváu, asina comu pal caltenimientu les antenes de telefonía asitiaes nes cotes cimeres del monte.
Magar la so importancia, esta pista carez na década cabera un gravísimu y nidiu estrozu. Nestos diez años les Alministraciones públiques amenorgaron enforma les inversiones y les actuaciones que realizaben pal caltenimientu la pista, precisamente cuandu ésta conoció los sos peores momentos, polos incendios qu’amburaron El Valledor en 2011 y 2017. Nun s’atendió afayaízamente la rexeneración de los montes amburaos, lo que fexo aprucir la fraxilidá ya inestabilidá del suelu y a un cambéu nes dinámiques de circulación de les augües pluviales. Ello ye la causa d’argayos frecuentes na pista, fondigamientos del tarrén, embanzamientu d’augües y otros daños que convierten l’usu la pista nuna práutica arriesgá. Mentantu, nos caberos años, les Alministraciones públiques tan sólo punxeron en marcha pequeñes actuaciones que suponen pequeños parches, temporales y sólo pa unos pocos sitios, pero que nun embriven un tris la gravedá la situación.
Cola pista nesti estáu, les empreses de tresporte ñéguense a asumir un contratu pa estrozar ellí vehículos normales. Asina, los tres neños d’Aguanes vense obligaos a percorrer, dos vegaes al díi, esos seyes kilómetros entre Aguanes y Robledo colos medios qu’apurren y costeen les sos families. Y, claro, hai díes duros del iviernu nos que nun-yos resulta posible dir a escuela.
Los vecinos yá pidieron milenta vegaes la igua la pista. L’alcalde d’Allande y el Conseyeru d’Infraestructures, Ordenación del Territoriu y Mediu Ambiente callen. Los vecinos yá s’ufieron, mesmamente, a iguar la pista per aciu d’una sestaferia, si la Ca’l Conceyu apurría los materiales necesarios. Más silenciu.
Primero silenciu. Llueu menacies. Sí, porque’l “Gobierno del Principado” llegó plantegar a estes familes dos soluciones tremendes, pero mui na llínia de la “modernidá” que representa l’Área Central Metropolitana. La primer propuesta foi recluyir los tres neños, de llunes a vienres, na Escuela Llar de La Puela (Allande), que yá nun fonciona comu tala, separtándolos de la familia. La segunda propuesta foi facilita-yos una vivienda social en La Puela, cuandu les families tienen llar n’Aguanes, quieren vivir ellí y ellí tán los sos medios de vida. Pero’l PSOE d’Allande y el PSOE del “Gobierno del Principado” ye lo que tienen, quieren arreglar la vida de la población rural sacándolo de los sos pueblos y treslladándolos a llugares más grandes: la filosofía de la superaldeona.
Nun se deben escaecer estos nomes: José Antonio Mesa Pieiga (alcalde d’Allande, PSOE) y Fernando Lastra Valdés (Conseyeru d’Infraestructures, Ordenación del Territoriu y Mediu Ambiente, PSOE).
La to firma ye un sofitu importante. DESCARGA EQUÍ un documentu pa recoyer firmes polos drechos educativos de los neños d’Aguanes (Allande) y pol drechu los vecinos a tener un acesu seguru al so pueblu. Aída a los vecinos d’Allande. Recueyi firmes y unvíales per corréu postal a…
Sureyna Muñiz – Aguanes del Valledor, 1 – 33887 Allande – Asturies
