El Clú de Prensa de LNE foi l’escenariu onde’l soberanismu asturianu espunxo la so postura sobro l’Ária Metropolitana Cientral, denunciando la falta d’una visión integral d’Asturies, el desdexamientu de les esnales d’Asturies y el mediu rural, y la intención del PSOE de faer d’ella un auténticu rucaeru.
Nel actu, que cuntó con una perbona participación de públicu, participaren Llucía Fernández, candidata d’Andecha Astur al Congresu español, David M. Rivas, profesor d’Estructura económica na Universidá Autónoma de Madrí, Roberto González Quevedo, doctor n’Antropoloxía y Xose Nel Riesgo, Xeógrafu y espertu’n Desendolcu Llocal. Les intervenciones fueron especialmente interesantes y espeyaren perbien la situación a la que les polítiques del PSOE nel «Principado» tan llevando al nuesu país, tantu nel tarrén del Ordenamientu del Territoriu, como económicu y social/antropolóxicu.
Nesi sen, Llucía Fernández desplicó la postura d’Andecha Astur al respeutu, que podríemos resumir nos puntos que vienen darréu:
1º.- Andecha Astur nun s’opón per principiu al Ária Metropolitana Cientral como conceutu, pero considera que cualisquier proyeutu d’estes carauterístiques tien que:
- Tar enartáu nuna visión nacional –integral- d’Asturies
- Contemplar una articulación efeutiva de tol territoriu.
- Evitar afondar nos desequilibrios territoriales
- Permitir integración socio-económica de los asturianos
Por embargu, la propuesta d’anguañu parte d’una conceición provinciana d’Asturies (quien faer d’una nación una provincia) que pretende aniciar una fastera urbana cientral privilexada arrodiada por unes esnales entá más desdexaes acelerándose entá más l’abandonu rural y el despoblamientu nes mesmes. De fechu la propuesta d’AM consiste básicamente nuna ciudá arrodiada d’un ermu.
2º.- Los “beneficios” d’aniciar un Ária Metropolitana Cientral son conocíos dende la entrada del Reinu d’España na XE, y de fechu foi plantegada nos años 80 pol PSOE dende’l “Principado”, por embargu, y pesia “ser tan positiva” como agora anuncien, lo cierto ye que nestos más de trenta años nun fixeron un res ¿A que vienen agora tantísimes prises?
3º.- Dende Andecha Astur consideramos que lloñe de ser pol interés d’Asturies, el PSOE defende un AMC, ye pola necesidá de siguir calteniendo les sos imenses Redes Clientelares y los “chiringos” pa los amigos, una vegada que yá nun puen cuntar coles perres de la Reconversión Naval, los Fondos Mineros, y les Aídes Europees.
La urxencia pa consiguir esi AMC desplícase namás pola necesidá del PSOE d’aceder a la xestión de nueos fondos europeos pa poder caltener redes clientelares y chiringos varios.
4º.- Namás nesi sen somos a atalantar la pretensión del “Principado” de reservase’l 49% de dicha AMC, un casu únicu no que conocemos d’Áries Metropolitanes, conformaes por conceyos ensin intervención –control- de les comunidaes autónomes.
5º.- Conforme a los plantegamientos d’anguañu l’AMC- integraríe a les 4/5 partes de los asturianos, y onde la “comunidá autónoma” tendríe una representación del 49%, colo que práuticamente solaparíase col propiu “Principado”, faciendo entá más inutil esta istitución autonómica impuesta dende Madrid.
6º.- La propuesta d’Andecha Astur pasa por recuperar la cadarma de “Poles” tradicional nel país, ello ye, refociar polos de desendolcu económicu ya industrial espardíos estratéxicamente pel territoriu nacional, de forma que se corrixan les desigualdaes estructurales agora mesmo esistentes y se caltenga’l texíu socio-económicu tradicional asturianu.
