Nun hai desplicaciones que xustifiquen l’ataque conxuntu de Vox y la Policía del PSOE a un profesor universitariu
Cuandu Vox anunció que la so peculiar reconquista d’España diba entamar n’Asturies nun desplicó que lo diba facer apalizando asturianos a comuña cola Policía española que dirixe’l PSOE. Eso foi lo qu’asocedió estos díis n’Uviéu, comu testimonien ensin posibilidá de dulda les semeyes que recueyen l’agresión, que tuvo llugar dientru’l propiu campus universitariu.
Andecha Astur solidarízase col profesor asturianu que, xunto con una parte de la comunidá universitaria, protestaba escontra la presencia de la ultradrecha española n’Uviéu; deseyándo-y una pronta recuperanza de les graves llesiones que-y prevocaron.
Andecha Astur denuncia comu vergoñosa ya inxustificable l’agresión que sofrió esti profesor, que, mentantu taba indefensu en suelu, recibió al tiempu golpes de porra d’un policía español y pataes d’un militante de la organización ultradrechista Vox. Non sólo eso, sinón que les fuercies policiales presentes torgaron que los estudiantes pudieren aidar al so profesor tres l’agresión.
Andecha Astur creye que nun hai desplicaciones oficiales que puean valir nesti casu, y que la demostrá collaboración represora ente la policía del PSOE y Vox fai inaplazable la dimisión de la Dellegada del Gobiernu español n’Asturies, la militante del PSOE Delia Losa.
