«Méxenmos enriba y dícenmos que llueve»; Llucía Fernández retruca a les afirmaciones de Pedro Sánchez nes qu’eloxia l’estáu del “bientar asturianu” comu exemplu d’autogobiernu
Falar de bientar n’Asturies roza la utopía ya indica muncha caradura o un desconocimientu completu de lo que se fala. La candidata d’Andecha Astur remembra-y al presidente d’España la situación en que mos alcontramos tres d’ocho llexislatures col so partíu al frente
«Nun país al que tan emprobeciendo sistemáticamente, al que desaniciaron tol texíu socioeconómicu, coles tases de desemplegu y precariedá de la mocedá mayores d’Europa, col indiz de probitú severo triplicáu nos caberos 10 años y cerca d’un 20% de probitú infantil, sabiendo que 41.000 paraos asturianos nun cobren siquiera prestación y que’n concreto, de magar la entrada de Pedro Sanchez nel gobiernu d’España perdieronse más de siete mil emplegos; siendo conoceores de que la estrema dificultá pa llevar una vida digno n’Asturies ta forciando a emigrar a decenes de miles d’asturianos nes caberes décades y que, cola tasa de natalidá más baxa l’estáu, la población asturiana cae en picáu, falar de «bientar asturianu» ye insultar a la intelixencia. Nun escaezamos qu’Asturies ye l’únicu territoriu del estáu que se caltién perbaxo’l 100% de xorrecimientu del P.I.B nos caberos cuarenta años. Nel mesmu tiempu el desemplegu medró cerca d’un 294% y la población cayo nun 6’8%
Concretar, enriba, lo bien que mos va en sanidá, con 17.000 asturianos en llistes d’espera que pueden ser de fasta 17 meses y un 10% de les baxes sanitaries ensin cubrir, o eloxar un sistema educativu antiasturianu, saturáu ya ineficiente, que fuercia al abandonu los pueblos por faltar, incluso, el tresporte escolar, con unos docentes que son los únicos del estáu a los que nun se-yos quitó la carga estra impuesta durante los piores intres de la crisis, eso ya ye, de frente, tomanos el pelo».
Respeuto al autogobiernu, la candidata declaró que «Lo mesmo ye falar d’autogobiernu, careciendo una sucursal títere de Madrí comu ye’l Principado, pa la qu’Asturies, la so población y la so cultura, son esclusivamente moneda de cambeu negociaciones».
Llucía Fernández aprofitó la ocasión pa remembrar les declaraciones de Pedro Sanchez nel so mitin elleutoral del 2015, cuando se dixo «arguyosu de la honradez del SOMA/UGT» y prometió que «Hunosa tinía’l futuru aseguráu».
