ANDECHA ASTUR afala al conxuntu de les asturianes y asturianos a participar nel manifestamientu pola Oficialidá de la nuesa llingua nacional que se cellebrará esti vienres n’Uviéu, coincidiendo cola cellebración del Díi de les Lletres Asturianes
Una Oficialidá dafechu, ensin complexos y ensin plazos pa la llingua asturiana, esa ye la desixencia qu’ANDECHA ASTUR llevará al manifestamientu convocáu nel Díi de les Lletres Asturianes, denunciando la situación de represión llingüística que carecemos, y qu’ANDECHA ASTUR vien de sufrir nesta postrer convocatoria elleutoral.
Ye precisamente agora, a les puertes d’unes elleiciones asturianes, cuando tien que quedar nidio quien ta pola oficialidá de verdá y quien queda en promeses y n’otros 4 años falando d’una oficialidá “a plazos” “amable”, ello ye, ensin conteníos, Lo más paecío a l’actual Llei d’Usu, cuyos resultaos venimos careciendo.
Andecha Astur reitera que la Oficialidá nun ye negociable, sinon un drechu humanu internacionalmente reconocíu que se mos ta ñegando a los asturianos y asturianes y que nun almite midíes intermedies, siendo puntu de partía imprescindible pa la normalización llingüística nel nuesu país y el futuru de la nuesa llingua nacional.
Por eso, esti vienres 3 de mayu, manifestarémosmos n’Uviéu, a les 19:30 na Estación del Norte. ¡Por una oficialidá ensin complexos! ¡Llingua Nacional, Llingua Oficial!
