Pernando Barrena: “Tenemos voz n’Europa y los asturianos tiénenla tamién, gracies a Andecha Astur.”
Llucía Fernández: “Los que cansamos d’aguantar les machaes del estáu español llantámos-y cara y llantámos-yla xuntos, pa facer más fuercia”.
Ayeri tuvo llugar en Xixónl’actu elleutoral de la coallición Agora Repúbliques, a la que pertenez Andecha Astur, xunta EH Bildu, Puyalón, Ahora Canarias, ERC y BNG.
Nella, tres d’una breve introducción musical, intervinieron el candidatu a la Xunión Europea por Agora Repúbliques, Pernando Barrena, d’EH Bildu y Llucía Fernández, candidata que representa a Andecha Astur na coallición.
Llucía entamó la so intervención falando de la costrución nacional “tamos chando los cimientos d’una república firme y bien afitada, pasiquín a pasu, malpenes entamen a vese les parees y los teyaos nun puen ponese, porque los teyaos nun se ponen nel aire. Queda muncho por trabayar, pero pa cuando finemos tendremos un país que podamos llamar nuesu”.
Criticó severamente’l votu útil ya’l posturéu de los que dicen defender l’asturianu pero nun lu utilicen nin nes sos comunicaciones internes nin esternes, nin nel so programa, nin nes sos papeletes, remembrando que namás se pue votar n’asturianu a Andecha Astur.
“Pero cuando se costruye un país, nun ye solo la llingua lo qu’hai que defender” amestó, aludiendo al ampliu programa col qu’Andecha Astur se presenta a estos comicios “Defendemos la reactivación de tolos seutores productivos -tradicionales y non- y vamos convertir esti país, que nunca me cansaré de dicilo, tien bayura pa ello, nun llugar nel que podamos quedamos a vivir y al que puedan tornar los que se vieron forciaos a colar”.
No que cinca a la Xunión Europea, coincidió con Pernando Barrena na importancia de participar nella con voz propia ya en comuña con otres naciones ensin estáu pa facer más fuercia “Reconocemos que’l modelu de Xunión Europea vixente, encadarmáu por y pa caltener los privilexos del gran capital, nun ye’l nuesu. Pero sí tamos dimpuestos a collaborar con cuantes fuercies polítiques europees apuesten por convertir, dende fora y dende dientru, esa Xunión Europea nun nueu modelu de rellaciones internacionales afayáu a los intereses de les clases populares y de les naciones d’Europa”. Pa desplicar meyor el conceutu, utilizó’l simil de los compañeros que se xunen pa enfrentar al abusón de la clase.
La so intervención finó con otra alusión a la inutilidá del mal llamáu votu útil “Non, señores, nun ye l’intre d’ellos. Ye’l d’Asturies y de los asturianos. Perriba’l votu útil, el del miéu o’l de les mentires, yo pídovos el votu de la coherencia. El de la xente que fae lo que diz y diz siempre lo mesmo. Y esi votu, n’Asturies, tien namás un nome: Andecha Astur, Agora Repúbliques”.
Pernando Barrenas insistió na so intervención na necesidá de dar a les elleiciones europees la importancia que merecen, “N’Europa ye onde se deciden el 75% de les polítiques que los países apliquen ya en política, l’espaciu que se dexa vacíu vien otru a ocupalu”. Por ello pidió que la xente acudiere a votar por Europa, pesia la refuga qu’esta istitución xenera en bona parte de la población, refiriéndose con ello a les caberes encuestes qu’amuesen la desafeción de los ciudadanos cola Xunión Europea “Dinero pa los bancos y polítiques d’austeridá, nun esperen que te aplaudan” insistió, pidiendo a los organismos europeos qu’asuman la responsabilidá sobre les consecuencies de les sospolítiques.
Tamién recordó delles de les actuaciones que se llevaron nos caberos años al Parllamentu Europeu en nome d’Andecha Astur, que, pesia la poca incidencia que tuvieron en prensa, foron perimportantes nel devenir asturianu poles sos consecuencies: la denuncia ante la OLAF del fraude d’El Musel y de los Fondos Mineros muncho anantia de que se reconocieren por parte d’otros partíos, la reclamación de la Oficialidá del asturianu a nivel européu o la entrega de datos sobre la contaminación atmosférica n’Asturies a la Comisión Européa pol Mediu Ambiente.
A nivel estatal, recordó a los presos políticos vascos y catalanes y resumió en poques pallabres “el problema nun ye Cataluña, nun somos los vascos, nin sois los asturianos, el problema ye España.”
L’actu finalizó cola interpretación a vigulín de la Flor del Agua, que foi canciada polos presentes.
INTERVENCIÓN DE LLUCÍA FERNÁNDEZ
Hola a toos, collacies, collacios. Güei, con esta duple campaña a piques de finar, quiero felicitavos, quiero felicitamos a toos. Por tar equí, pol enfotu puestu. Sois munchos de los presentes los que fixisteis posible la presencia d’Andecha Astur y la presencia d’Agora Repúbliques nes cais, nes redes sociales, nes carreteres, d’una punta a otra d’Asturies.
Tamos faciéndolo bien. Tamos faciéndo país.
Hai quien nun ye a velo, porque esto nun ye una tienda campaña, n’Andecha tamos echando los cimientos d’una república firme y bien afitada, pasiquín a pasu, malpenes entamen a vese les parees y los teyaos nun puen ponese, porque los teyaos nun se ponen nel aire. Queda muncho por trabayar, pero pa cuando finemos tendremos un país que podamos llamar nuesu, onde vivir dignamente, ser llibres, colos drecho sintautos, falando la llingua de nueso, siendo nós mesmos.
Porque esti ye l’intre, ye Agora, ye Asturies
Sí, tamos faciéndolo bien. Nun hai más que ver la imaxinación qu’echen pa desfacese de nós, los malabarismos que faen pa invisibilizamos, les torgues que mos ponen pa que nun se mos escuche.
La cabera, papeletes d’Andecha colos nomes cortaos a la meta, defeutuoses y polo tanto susceptibles de ser anulaes. Cuando se-yos reclama, miren pa otru lláu y dicen que nun mos entienden, que claro, comu l’asturianu nun ye oficial nun tienen porque dase por aludíos y que, si nun lo lleen n’Español, nun ven que les papeletes qu’ellos mesmos fexeron tan mal guillotinaes.
Por que claro, nós, n’Andecha Astur, la documentación apurrímosla n’Asturianu, acordies al drechu que mos da la Llei d’Usu y la sentencia ganada por Andecha énte’l Tribunal Supremu nel añu 2000, que reconoz el drechu al usu de la nuesa llingua nos procesos elleutorales y que dengún otru partíu aprofita. Nós si, comu bien sabeis, les nueses papeletes son les úniques que vais topar n’asturianu. Porque Ye Asturies.
Tamos faciéndolo bien, porque somos coherentes colo que dicimos.
¿Cómu puede daquién creer que se va defender l’asturianu dende partios que, non solo son reconocidamente españoles, sinón que nun usen la nuesa llingua, nin nes sos comunicaciones internes nin cola alministración, nin nos sos programes, nin nes sos espublizaciones, nin muncho menos nes sos papeletes?
Pero cuando se costruye un país, nun ye solo la llingua lo qu’hai que defender.
Y pa siguir faciéndolo bien tenemos de guía un programa elleutoral qu epunximos en manes del Pueblu Asturianupa que lu redactare en comuña con nos, al traviés del proyeutu “Asturies nes tos manes”, llema tan guapu qu’hebio quien mos lu copió.
Son 25 puntos nos que recostruyimos la cadarmad’esti país. Lleeríavos los 25 puntos pero igual me mandais a paséu, asina que meyor vos los resumo rápidamente: Defendemos el nuesu futuru comu Pueblu Asturianu, con un espaciu económicu, cultural, y social propiu, sofitando’l territoriu enteru asturianu, ensin crear guetos nin desiertos, nin muncho menos convertir Asturies nun parque temáticu de si mesma.
Defendemos la reactivación de tolos seutores productivos -tradicionales y non- y vamos convertir esti país, que nunca me cansaré de dicilo, tien bayura pa ello, nun llugar nel que podamos quedamos a vivir y al que puedan tornar los que se vieron forciaos a colar.
Depués de décades denunciando que fundieron, que tan fundiendo Asturies, agora ye l’intre d’entamar coles soluciones, y les soluciones vendrán dende Asturies.
Pero Asturies nun ta sola nel mundiu, y nesi campu tamién lo tamos faciendo bien. Reconocemos que’l modelu de Xunión Europea vixente, encadarmáu por y pa caltener los privilexos del gran capital, nun ye’l nuesu.
Pero sí tamos dimpuestos a collaborar con cuantes fuercies polítiques europees apuesten por convertir, dende fora y dende dientru, esa Xunión Europea nun nueu modelu de rellaciones internacionales afayáu a los intereses de les clases populares y de les naciones d’Europa.
Comu sabeis, y por eso tamos güei equí, a les elleiciones europees presentámonos de la man d’Agor aRepúbliques, con otres formaciones soberanistes d’izquierdes que carecen l’estáu español. Tovía hai quien m’entruga cómu nos, que refugamos ser representaos por españoles, confiamos en que mos representen vascos o catalanes…
Pa que s’entienda facilínn voi facevos una comparación cenciella: ta’l típicu abusón de la clas, fuerte, violentu, probablemente con toques sicópates, imponiendo’l so orde y la so llei. Tan los compañeros que s’arrimen a elli pa medrar a la so solombra, llevando per delante a quien faiga falta. Tan los apoquinaos que s’engurrien nuna esquina esperando a que pase lo más gurdio, combayando y pagando lo que-yos pidan.
Y tan los que nun gachen la tiesta y se xunen pente ellos pa enfrentar al abusón. Pente esos caberos tamos nós. Eso ye Agora Repúbliques. Los que cansamos d’aguantar les machaes del estáu español y llantamos cara, y llantámos a xuntos, pa facer más fuercia.
Por eso decimos qu’Asturies tendrá, comu pocu, tres representantes nel Parllamentu Européu, un d’ellos esti home que ta equí con nos, Pernando Barrena, pa llevar la nuesa voz, les nueses propuestes, les nueses denuncies énte Europa, comu yá se fizo anteriormente al traviés de Los Pueblos Deciden. Asturies tará con fuercia n’Europa.
Quien vendenos a tou trapu’l votu útil. ¿Qué ye’l votu útil? ¿útil pa quien? Porque útil, teóricamente, ye que val pa daqué, y nun soi a ver cómu votar lo que nun quiero, incluso tapando les ñarres comu lleí perende, cómu poner a Asturies en bandexa pa que siga siendo vendía al meyor postor pue ser útil.
Vienen usando esta falacia del votu útil dende l’entamu d’esta mal llamada democracia que mosp unxeron enriba, primero, recién muertu Pachu, col votu del miéu. Lluéu, alternando colos votos del castigu pa un y otru lláu. Va pocu, tornaron col votu del miéu. Y agora, n’Asturies, quien vendenos el más ridículu, el votu útil de la fe ciega.
Y digo fe, porque fe ye creyer no que nun se vio. Creyer que los mesmos que fasta agora tuvieron a la escontra la nuesa llingua, y del nuesu país, los que mos robaron, los que ficieron tolo posible por desaniciarAsturies, los que mos ficieron tragar, ensin votalu, un Principado que mos conderga a ciudadanos de segundes, y los sos socios collaboradores, los que pauten con ellos, de sópitu esmolecense por Asturies y pola so llingua Y …tan dispuestos a concedemos el gran favor de facela oficial.
Non, señores, nun ye l’intre d’ellos. Ye’l d’Asturies y de los asturianos.
Perriba’l votu útil, el del miéu o ’l de les mentires, yo pídovos el votu que val.
Pido’l votu de la coherencia. El de la xente que fae lo que diz y diz siempre lo mesmo. Y esi votu, n’Asturies, tien namás un nome: Andecha Astur, Agora Repúbliques.
