A munchos abultará-yos que los nuesos resultaos son increyibles

Llucía Fernández, candidata a les elleiciones nacionales por ANDECHA ASTUR, fai les primeres valoraciones de les postreres convocatories elleutorales.

¿Una primer valoración sobro los vuesos resultaos nes elleiciones nacionales d’esti domingu?

En primer llugar quiero felicitamos pola progresión que conseguimos pesia les circustancies alverses dafechu a les que mos enfrentábemos. Nun podemos torgar que los medios de comunicación -tantu públicos comu privaos- mos tabiquen, nun cuntar con sofitos istitucionales, ser represaliaos y discriminaos pola Xunta Elleutoral por usar l’asturianu, pero ca pasín nuesu, ca votu ganáu, ye un auténticu reblagu

Ye nidio que’l de nueso ye un votu lleal, de xente concienciao, que tien les idegues clares y que nun se dexen engañar fácil por promeses de puestinos nin castiellos nel aire. De fechu a munchos abultará-yos que los nuesos resultaos son increyibles, teniendo en cuenta la invisibilización que toles nueses aiciones tienen gracies al silenciamientu que carecemos nos medios de comunicación.

Ta nidio tamién que les nueses aspiraciones son bien otres: tenemos vocación de ser una organización con representación istitucional, queremos utilizar también eses canales p’algamar la necesaria tresformación social qu’Asturies necesita.

¿Y no que cinca a les Europees?

Ehí nun podiemos tar más satisfechos: cuntamos con trés representantes que darán voz en direutu a Asturies, ensin interferencies españoles pel mediu. Va ser un calce importante pa influyir na política europea, onde se xueguen munches partíes qu’importen a Asturies y onde la defensa de les llingües minorizaes o la llucha escontra la contaminación tienen un espaciu importante que nós aprofitaremos al másimu.

¿Qué diríes de los resultaos xenerales?

Al votar al PsoE la sociedá asturiana acaba d’encumbrar a los corruptos, a los que fundieron Asturies nuna concienzuda llabor d’años. Pero si esto pasa ye gracies a que los otros partios españoles que se dicen d’izquierda blanquearon la responsabilidá del PsoE, non solo non fiscalizando nin auditando la corrución, sinon formando gobiernos con ellos, incluso aprebándo-yos los presupuestos, dando-yos credibilidá y permitiendo que se puedan presentar énte los ciudadanos comu si nun fueren los responsables d’esfarrapar Asturies.

Per otru lláu, si hai daqué que los resultaos demuestren ye que realmente los partíos que se vendieron comu “votu útil” p’Asturies nun lo son dende dengún puntu de vista, y lo único que consiguieron vendiendo esa falacia foi facer que se perdiere la oportunidá de meter nes istituciones a la xente digno, a los que siempres defendimos y defenderemos Asturies perriba de cualisquier otru interés presonal, y qu’enxamás nun fiximos el xuegu al PSOE.

¿Cómu queda Andecha Astur después d’estes elleiciones?

Estes elleiciones topáronmos en plenu procesu d’ampliación y d’acumulación de fuercies, creando un frente ampliu de puntos mínimos y poniendo’l nuesu enfotu’n facer medrar lo mas posible la base social. Lo que ficieron estes elleiciones foi precisamente potenciar la nuesa capacidá pa llevar eso a efeutu. Tamos volcando los nuesos enfotos nuna reorganización que mos permita dir incorporando a les munches presones qu’a lo llargo de la campaña se punxeron en contautu con nós, yá dende la recoyíaa de les 10.000 firmes pola República, pa collaborar, pa informase, pa informar… la rempuesta social d’estos meses foi espectacular.

De fechu, en plena campaña roblemos un alcuerdu con importantes seutores del asturianismu/soberanismu, un alcuerdu que bien ceo entamará a dar resultaos, de los que diremos dando novedaes prosimamente.

Somos la única alternativa de recostrución nacional y social d’Asturies y convidamos a toles asturianes y asturianos, a que s’averen non solo a collaborar con nós nesti procesu de recostrución nacional y pa garantizar que nel futuru seyamos una alternativa, sinon a que cunten con nós p’acompangalos nes sos lluches polos drechos sociales, llaborales y culturales d’Asturies.