Definise comu socialista y entamar la llexisllatura xubiéndose’l salariu fasta multiplicar por seyes el SMI ye en si mesmo un oximorón col que Ana González ya’l so executivu naguren el so mandatu dando una pista de per onde van dir los tiros los próximos cuatro años
Nuna ciudá na que se duplicaron en dos años los casos d’emerxencia social, con 245 denuncies nun añu por agresiones a muyeres, 14 a menores, colos índices de contaminación atmosférico colapsando periódicamente les urxencies por problemas respiratorios y que vien de ser sancionada pola falta de depuración de les sos agües residuales, -agües qu’avecen finar nes mesmes playes, bandera del so proyeutu económicu-turísticu pa Xixón-. Nun conceyu con graves problemes de vivienda, de falta de servicios y cadarmes na so fastera rural, de desindustrialización y progresiva precarización llaboral, n’ún país con cientos de miles d’emigraos forciosos, onde muerren el duple de persones que ñacen y más del 15% de la so población vive n’infraviviendes ya’l 18% de los sos ciudadanos son, direutamente, probes, ehí mesmo, un partíu autoproclamáu socialista vien de proponer xubise’l salariu a los miembros del gobiernu como una de les primeres midíes.
Nun se si ye que’l PSOE ve venir les vaques flaques, col fin del chollu de los fondos mineros que tan a gusto se repartieron, y agora nun ven comu caltener les sos redes clientelares o si ye cenciellamente que nun tienen vergoña denguna. Lo que si se ye que pa los xixoneses que soportamos les consecuencies de toles sos crisis, reconversiones y polítiques de desaniciu, sentir qu’esta xente va xubise’l salariu pente 2.500 y 4.000 € añales ye una tomadura de pelu impresentable. Prestaríame dicir “ensin precedentes”, pero llamentablemente sí que los tien.
