Andecha Astur llama a la participación na XXIII fiesta de la Oficialidá de Bimenes que se cellebra esti sábadu 6 de xunetu.
Güei más que nunca, cuando paecen confirmase les piores espeutatives pa la oficialidá del asturianu, al nun cumplise les tan elleutoralistes como poco rialistes previsiones d’algamar una mayoría na Xunta Xeneral que pudiere camudar l’estatutu d’autonomía del “Principado”, Bimenes ye un referente obligáu de coherencia y enfotu.
Dempués de cuatro años onde los que dicen tar pola oficialidá nun fixeron más que posturéu, rentabilizando políticamente la oficialidá, pero ensin aprebar denguna midía política ellí onde teníen capacidá pa faelo –nos conceyos onde gobernaren o calteníen los gobiernos- y cuandu’l llamáu al “votu útil” p’algamar la oficialidá yá se reveló como lo que yera, un argumentu elleutoralista ensin denguna base rial, la Oficialidá de Bimenes ye la espresión concreta de per ónde pue dir avanzándose metantu y non se supera la situación predemocrática que carecemos nel tarrén llingüísticu, onde la nuesa llingua non solo nun ye oficial, sinon qu’el so usu ye castigáu y oxetu de represión, talamente como vien de pasar a Andecha Astur nestes elleiciones caberes.
Por eso, esti 6 de xunetu hai que tar en Bimenes, pa dexar nidio que yá ta bien d’enredar y sacar réditos políticos colo que ye un drechu inegociable del conxuntu del Pueblu Asturianu, pa desixir drechos y denunciar posturéu, pa dar otru reblagu más na Oficialidá de la nuesa llingua nacional.
