Nun ye casual qu’el conceyu más comprometíu colos drechos llingüísticos tea gobernáu por un alcalde ayenu a cualisquier dependencia partidista española
Onde la llingua nacional se defenda con fechos, ehí taremos: el compromisu d’Andecha Astur fae imprescindible la nuesa presencia añal en Bimenes, sofitando la llabor del únicu conceyu’l país nel que la oficialidá ye un fechu.
El conceyu yerbatu lleva demostrando, va yá 23 años, que ye posible, que ye positivo y que namás la voluntá o la falta d’ello ye lo que marca la desemeyanza pente un pueblu con drechos ya otru ensin ellos. Comu dixo na so intervención Aitor García, alcalde de Bimenes, hai quien quier facer de los asturianos ciudadanos de segunda y de nos depende torgar qu’eso ocurra. Aitor mencionó tamién la miseria de los “políticos de corbata”, llanzando un avisu a los que “s’empuerquen les manes y non de trabayar”.
Nesi sen nun puede dexar de ser llamativo la presencia nel actu de personaxes perconocios nel entornu políticu que non solo nun faen lo posible por algamar la oficialidá -de querer ellos va años la tendriemos- que nun pasen del posturéu puru y duru, y qu’en dalgunos casos son elementos nidiamente negativos na brenga llingüística.
N’otru sen, ye ilusionante ya ispiraor la implicación ya l’enfotu puestu por un pueblu que se vuelca ca añu en festexar la nuesa llingua. Gracies, yerbatos.
