El Gobiernu español engaña a los asturianos sol “Castiellu Salas”: ñega tener competencies y tampocu estudios fechos.
Andecha Astur quier que’l Conceyu Xixón y el Gobiernu de Barbón desixan a Madrid compensación de gastos ya indenización pol atentáu ecolóxicu.
Andecha Astur presentóse nes caberes elleiciones estatales comu parte de la coalición “Agora Repúbliques”, en xuntanza con EH Bildu, Esquerra Republicana, BNG y fuercies soberanistes aragoneses y canaries. Gracies a esta collaboración política, el diputáu Jon Iñarritu (EH Bildu) presentó al gobiernu de Pedro Sánchez una entruga sobro los estudios pa esclariar la procedencia de les manches de carbón que períodicamente afeuten a la sablera San Llorienzu.
Acaba conocese la rempuesta del PSOE. Per un llau el gobiernu español diz “que la llimpieza, hixene y salubridá de les sableres son competencies municipales”, dalgo que ye de sobra conocío. Lo que tapez, y por ello miente, ye que foron autoridaes estatales les que decidieron nun rescatar al buque “Castiellu Salas” y arrastralu pa que se fundiera nuna fosa énte la costa xixonesa. Los vertíos na mar, la calidá de les agües marines y el caltenimientu les sableres son responsabilidá esclusiva del estáu, dalgo que silencia’l gobiernu español con enfotu d’engañar a la opinión pública asturiana y tenela aselá nesti casu.
El graneleru “Castiellu Salas” tresportaba 100.000 tonelaes de carbón cuandu en 1986 embarrancó énte L’Atalaya, en Xixón. La decisión estatal de nun rescatar el barcu, sinón de llevalu a fundise a una fosa na mar abierto asitiá énte los cantiles xixoneses, ye la causa de que na sablera San Llorienzu se recueyan unes 10 tonelaes añales de carbón, procedentes del buque.
Na rempuesta que l’Estáu español da a Andecha Astur, al traviés del diputáu Jon Iñarritu, tamién se diz que’l Ministeriu pa la Trensición Ecolóxica nun afaló estudios pa conocer la procedencia d’estes manches de carbón. Lo cualo nun dexa de ser otra mentira más, porque entrugábase pola aición xeneral del Gobiernu. Y lo que se calla nesa rempuesta ye qu’el “Instituto Nacional de Carboquímica”, dependiente del CSIC y, nesa considición, dependiente del Ministeriu de Ciencia, Anovación y Universidaes, sí tien estudios sobro los vertíos na sablera xixonesa.
Ye curioso que l’Istitutu’l Carbón determinare yá en 2002 y 2011 que les manches de carbón de San Llorienzu procedíen del bueque que l’Estáu español fundió de mou irresponsable énte la costa xixonesa.
Viendo tanta mentira y falta responsabilidá política por parte’l gobienu español, Andecha Astur píde-y al Conceyu Xixón que polo menos desixa a Madrid l’asunción de la responsabilidá económico. Esto ye:
- Que l’Estáu español abone al Conceyu Xixón tolos gastos qu’ésti atiende por mor del fundimientu’l “Castiellu Salas” énte la costa xixonesa (investigación, xixilancia de les agües, análisis d’agües y arenes, llimpieza la sablera, etc).
- Que l’Estáu español asuma indenizar al Conceyu Xixón pol determín enquivocáu de fundir el buque énte los sos cantiles y por toles consecuencies mediuambientales que Xixón carez por esi fechu.
Andecha Astur tamién pide al Gobiernu d’Adrián Barbón que nun se ponga de cantu, escusándose con que ye un problema ente alministración municipal y estatal. Y que sofite con determín al Conceyu Xixón na desixencia de les pertinentes compensaciones económiques pol atentáu ecolóxicu que l’Estáu precovó n’agües marítimes asturianes.
