ANDECHA ASTUR presenta candidatures al Congresu y al Senáu

La única organización asturiana nes elleiciones de payares pide reflexón a los asturianos y convídalos a votar por Asturies

La repetición d’estes elleiciones estatales pon n’evidencia que los partíos políticos españoles y el sistema que los sustenta van de fracasu en fracasu, ensin ser quién a dar rempuesta a les aspiraciones de progresu, sociales, nin nacionales de los Pueblos del Estáu.

Ello ansina, y énte unos partíos españoles ensin otru horizonte que los sos propios intereses políticos Andecha Astur considera positivo presentase a estes elleiciones, sofitando asina’l determín de llibertá y progresu que comparte con otros pueblos del Estáu. Porque ye bien sabío que n’Asturies, Andecha Astur con Euskadi, Catalunya, Galicia, Aragón, Canaries y otros pueblos ta conformando una rede de defensa de los países que tán sometíos al Estáu español, vindicando’l so futuru comu repúbliques. Defender los intereses de los nuesos pueblos nesta convocatoria elleutoral ye un pasu importante nesa vindicación.

Ye por ello polo que, pesia ser coscientes de qu’estes son unes elleiciones mediatizaes pol sistema y polos intereses de los principales partíos españoles, Andecha Astur toma’l determín de presentar candidatures, porque trátase de la única opción política asturiana que tará presente, la única qu’ asegura una defensa firme d’un futuru de progresu pa los asturianos y asturianes y que tien Asturies como únicu ámbetu d’aición y decisión.

Por eso, porque tenemos un proyeutu de vindicación nacional y de tresformación social qu’ufiertar a la sociedá asturiana frente a la dependencia y la sumisión de les sucursales españoles n’Asturies, Andecha Astur preséntase énte la sociedá asturiana como una ferramienta útil que permita avanzar haza una Asturies soberana y socialista, que garantice les llibertaes individuales y colleutives, entamando pol drechu a trabayar y vivir dignamente,  y que fine cola emigración forciada de la mocedá asturiana, coscientes de que namás votando una opción asturiana tendrá posibilidaes de repatriase y costruyir un futuru dignu na so tierra.

Nin la socialdemocracia española, nin la esquierda posibilista, nin les fuercies lliberales defenden los intereses d’Asturies, nin de los sos trabayaores, nin la necesidá de xusticia social, trabayu dignu y bien retribuyíu, progresu caltenible… Ye más, son los responsables de la destruición del nuestu texíu socio-económicu, la precariedá y l’esfarrapamientu cultural.

Poro, ente otres munches razones, Andecha Astur preséntase a estes elleciones y convídate a reflexonar sobro la to participación nelles: ¿Y si agora votes por Asturies?