Casu Riopedre-PSOE ¡Falta Areces!

Cumplimientu íntegru de les penes, non a los indultos y torna de lo robao, eso ye lo mínimo pal cumplimientu de la sentencia nel casu Riopedre-PSOE

Andecha Astur considera una xusta reparación a la sociedá asturiana que los condergaos pola sentencia del casu Riopedre-PSOE (tamién conocíu comu casu Marea) acaben d’ingresar en prisión. Ye’l llugar afayaízu pa compensar los graves delitos prebaos na sentencia del Tribunal Supremu: prevaricación, malversación, cohechu y falsedá.

Andecha Astur creye que la sentencia foi llandia pa la gravedá de los fechos demostraos. Sicasí, pa que, polo menos, agora la xusticia fecha paeza seria tien de desixise’l cumplimientu íntegru de les penes, tien de ñegase la concesión d’indultos a los condergaos y tien d’aplicase tol rigor de la xusticia pa consiguir la devolución de la totalidá de lo robao, pos tamos falando de millones d’euros procedentes de los presupuestos públicos d’Asturies.

Nunca n’Asturies, anque non por falta de corruciones similares, conocimos una sentencia de tanta gravedá. Porque’l Tribunal Supremu considera acreitao que nel tiempu en que Álvarez Areces presidió’l gobiernu asturianu “quedó sostancialmente corrompíu’l procedimientu d’axudicación de contratos de suministru y d’obres en varies Conseyeríes” d’esti gobiernu, a saber la Conseyería d’Educación, la Conseyería d’Asuntos Sociales, la Conseyería de Cultura y la Conseyería d’Alministraciones Públiques.

El Tribunal Supremu afitó na so sentencia que colos fechos condergaos non sólo resultó ñidiamente perxudicáu’l padremuñu públicu asturianu, “sinón que llantóse de facto un sistema d’axudicación de los contratos conveníos cola Alministración qu’afeutaba a tol sistema de la Comunidá Autónoma y non sólo al padremuñu d’ésta”, pola comisión de delitos de cohechu, malversación, prevaricación y falsedá, polo que, en términos políticos, puen definise aquellos años de mala gobernanza comu de corrución sistémica.

Ye dicir, la sentencia del casu Riopedre-PSOE ye una preba indubiatible de que’l PSOE convirtióse, na dómina d’Areces, nun réxime mafiosu al frente de la gobernanza d’Asturies. Un réxime qu’agora Barbón intenta blanquiar cola mayor rapidez posible.

Tamos ente la más grave de les crisis polítiques que tuvo d’encariar Asturies dende l’empiezu del réxime borbónicu de 1978. Poro, Andecha Astur comprométese a plantegar pronto y públicamente dalgunes consecuencies polítiques que paecen necesaries. De momentu, convida a les asturianes y asturianos a nun sofitar opciones mafioses y corrutes na prósima convocatoria elleutoral de payares.