“Nel 34 declaremos la República asturiana, nel 37 ficímoslo otra vegada, y agora, tornaremos a declarala”
El tradicional actu qu’Andecha Astur vien entamando tolos 12 d’Ochobre n’alcordanza y homenaxe ala Revolución Asturiana d’Ochobre’l 34, entamó con un emotivu homenaxe floral delantre la tumba de Belarmino Tomás, cabezaleru n’ochobre’l 34 y presidente del Conseyu Soberanu, la postrer istitución democrática asturiana.
Darréu tuvo llugar la intervención política d’Ana Fernández na que repasó los fechos hestóricos más rellevantes, la continuidá de la llucha pesia la represión, y enllazó la declaración de la República Obrera y Campesina d’Asturies nel 34, y la del Conseyu Soberanu d’Asturies y Llión, col compromisu d’Andecha Astur trabayando por una República Asturiana como proyeutu de futuru p’Asturies, y en collaboración con formaciones soberanistes de les naciones que participen nel proyeutu d’Agora Repúbliques nel que s’afaya Andecha Astur.
Nel mesmu sen defendió la necesidá d’afitar “un proyeutu políticu de tresformación social que tea Asturies como marcu específicu d’actuación”, y defendió la presencia d’Andecha Astur na prósima convocatoria d’elleiciones del 10P, faciendo un llamamientu p’ “afitar votu ente votu un espaciu políticu propiu que se ñega a almitir qu’l servilismu y la sumisión de les sucursales españoles n’Asturies seyan una alternativa, y qu’apuesta por Asturies y pol Pueblu Asturianu”.
Tres remarcar l’esfuerciu d’Andecha Astur pa ufiertar a la la sociedá asturiana una alternativa viable na qu’el Pueblu Asturianu seya’l protagonista. L’actu finó col canciu de la Flor del Agua.
