Ye Catalunya, ye Asturies ¡Somos toos y toes!

La sentencia del Triubunal Supremu conocía ayeri, escontra los políticos catalanes del “Procés” son un castigu inxustu que pretende resultar exemplarizante escontra cualisquier intentu d’exercer el drechu a decidir.

Nesti casu ye’l pueblu catalán el que sufre les consecuencies d’un Estáu antidemocráticu, pero’l mensaxe de fondu va dirixíu escontra tolos pueblos del Estáu qu’aspiramos a un sistema democráticu nel que decidir si queremos república o monarquía, sumisión o soberanía, nun suponga cárcel y represión.

Ye un díi triesti pa tou demócrata, porque queda nidio que la “transición” nun resolvió los problemes el Estáu español. Ye más, lo que pon n’evidencia ye que la calidá democrática d’esti Estáu queda pelos suelos, cuando énte un conflictu identitariu que s’espresa democrática y pacíficamente namás sabe aplicar represión y cárcel.

Les aspiraciones del pueblu catalán, como les d’otros pueblos del Estáu, choquen siempres escontra la “sagrada unidá d’España” -como persabemos n’Asturies tres l’ochobre’l 34- que, tres cuasique mediu sieglu de la so democracia, sigue ensin poder cuestionase por métodos pacíficos.

Mentes casos graves de corrución -como’l casu Ripedre– son trataos con guante blancu pol sistema xudicial español, con periodos d’istrución que duren más de 10 años demientres los cualos los acusaos tan tranquilamente en llibertá, nel casu los políticos catalanes el poder xudicial, heriede direutu del franquismu cuya idioloxía comparte, busca un ensañamientu y un castigu exemplarizante.

Per too ello, dende Andecha Astur solidarizámosmos colos condergaos, los soa familiares y compañeros, y en xeneral con tol pueblu catalán, y como demócrates refugamos dafechu esta inxusta sentencia.