Andecha Astur presenta una alternativa asturiana frente al fracasu de los partíos políticos españoles y el sistema que los sustenta.
A pie de cai, nuna escandalosa desigualdá de condiciones económiques, istitucionales y mediátiques, Andecha Astur entamó esta campaña elleutoral poniendo Asturies na axenda, llamando a la implicación de la sociedá asturiana nuna alternativa propia, alloñada del sucursalismu, servilismu y sumisión de les candidatures españoles que se presenten nel nuesu país, siendo la única organización con un proyeutu asturianau y p’Asturies.
Por eso Andecha Astur fexo nesta campaña un llamamientu al conxuntu del Pueblu Asturianu pa que vote en clave asturiana, pa que vote por Asturies, pa que dexe de sofitar partíos políticos que tan fundiéndomos el país, y que seya cosciente que nin dende la socialdemocracia española, nin la esquierda posibilista, nin les fuercies lliberales defenden los intereses d’Asturies, nin de los sos trabayaores.
Andecha Astur ye la única opción política asturiana que tará presente, la única qu’ asegura una defensa firme d’un futuru de progresu pa los asturianos y asturianes y que tien Asturies como únicu ámbetu d’aición y decisión, por eso pidiemos el votu a sabiendes de la cuasique imposibilidá d’algamar representación: porque ca votu recibíu va suponer un pasu pa p’avanzar nel proyeutu de vindicación nacional y de tresformación social qu’ufiertamos a la sociedá asturiana frente a la dependencia y la sumisión de les sucursales españoles n’Asturies.
Por eso nun apaeció Andecha Astur na prensa, na radio, na televisión, pero sí al to llau, na cai. Porque’l nuesu mensaxe molesta a la totalidá d’aquellos que defenden faer d’Asturies un barriu de Madrid, una bonita provincia del norte. Por eso dende’l facismu español pídese la illegalización d’Andecha Astur, por eso dende la propia izquierda española n’Asturies achántase énte semeyante agresión: porque les nueses propuestes de Soberanía y xusticia social molésten-yos por igual.
