Elleiciones 10P. Valoración y llinies d’actuación

Acabante cellebrar les elleiciones estatales del 10P, espresión del fracasu de los partíos políticos españoles y del sistema que los sustenta al ser una repetición de les del pasáu 28A, Andecha Astur quier agradecer públicamente toos y caún de los votos recibíos, y perespecialmente a les presones que participaren de forma direuta o indireuta na campaña elleutoral.

Fecho esto, paezmos preciso faer les valoraciones que vienen darréu:

• Los oxetivos d’Andecha Astur al tornar a presentase a estes elleiciones yeren básicamente dos:
  • Ufrir a la sociedá asturiana la posibilidá d’espresar la so voluntá de votu a una alternativa asturiana nestes elleiciones.
  • Cumplir colos compromisos alquiríos cola coallición Agora Repúbliques de la que formamos parte xunto con ERC, EH Bildu, BNG, Puyalón y Ahora Canarias.

Dambos oxetivos foron cumplíos de mou afayaízu

• Dende un entamu foimos coscientes de qu’a la reinal desigualdá de condiciones na que mos presentamos –ensin financiación nin sofitu istitucional, discriminaos polos medios de comunicación públicos y tabicaos polos privaos…- nesta ocasión había d’amestar una mayor polarización del votu a los partíos que podíen protagoniar la posterior formación de gobiernu, colo qu’eso supón d’aprovechamientu del mal llamáu “votu útil”, con claru perxuiciu de la nuesa opción política.
• Valoramos positivamente la campaña rializada, atalantando que consiguióse superar en bona midía el boicó mediáticu que carecemos, llevando’l nuesu mensax a la sociedá asturiana, gracies al compromisu y bon faer de militantes y simpatizantes de la organización.
• En cuantes a los resultaos cuantitativos queremos faer les siguientes considerances:
  • Resulta perpositivu’l xorrecimientu del nuesu porcentaxe de votos nun 7%, siendo l’únicu partíu de izquierdes que xorreció porcentualmente, y ello mentes el restu de partíos estraparllamentarios baxaben el so porcentaxe ente un 22 y un 33% .
  • Pesia ello, somos coscientes de qu’el rangu votos nel que mos movemos ye nidiamente insuficiente pa los nuesos oxetivos y rellativiza la importancia del xorrecimientu porcentual al qu’enantes faíemos referencia.
  • El votu recibíu ye un votu idiolóxicu, un votu de calidá, darréu que los votantes son percoscientes de que col so votu tán sofitando un proyeutu políticu de progresu, comprometíu cola recostruición nacional y social asturiana. Saben que tán votando por camudar el sistema socioeconómicu, pola Soberanía d’Asturies y pola República Asturiana.
  • Too ello perafita la esistencia d’una base social de votantes, cuya llealtá y compromisu col proyeutu son una garantía del mesmu, dellimitando un espaciu políticu común nel qu’hai d’afondar.
• Los resultaos elleutorales a nivel estatal valieron, eso sí, pa esclariar la llaceriosa rialidá qu’escuenden los partíos españoles. A la esquierda supuestamente alternativa de Podemos faltó-y tiempu p’abrazar a la socialdemocracia corruta del PSOE. La drecha española sigue decantándose y faciendo visible’l posu facista que siempres tuvo ehí tapecíu. Y aquelles naciones que voten fuercies propies acolumbren posibilidaes riales de meyorar les condiciones de vida de la so ciudadanía y la so posición nel conflictu col Estáu español.
• Per otru llau, pervese como’l pautu de Podemos col PSOE a nivel estatal va suponer una mayor devaluación de la función d’oposición política de la sucursal de Podemos n’Asturies
• De magar lo enantes espuesto, y dao la nuesa voluntá y vocación de representar nes istituciones al pueblu asturianu, como ferramienta afayaíza en defensa d’Asturies y de los nuesos drechos y llibertaes presonales y colleutives, consideramos d’urxencia avanzar nun procesu d’entendimientu y collaboración col conxuntu del asturianismu / soberanismu y en xeneral con toes aquelles presones que defendan la democracia n’Asturies, y un futuru de tresformación social, progresu y meyora de la calidá de vida de los asturianos y asturianes.

• Ello asina plantegamos la necesidá d’un procesu d’acumulación de fuercies que permita un Frente Ampliu que meyore la nuesa capacidá d’organización y rempuesta, que permita afondar nos avances sociales y nacionales, y rentabilizalos istitucionalmente.

• Nesi sen Andecha Astur quier anunciar el prósimu entamu d’una campaña pa faer rialidá esa acumulación de fuercies y esi Frente Ampliu, too ello nuna dinámica participativa y abierta al conxuntu la sociedá asturiana, qu’a la fin tien de ser la principal protagonista.

En Xixón a 11 de payares de 2019