Tres d’agradecer a los militantes y votantes d’Andecha Astur pol enfotu y la llealtá demostraos nestes elleiciones, Ana Fernández, candidata al senáu, insistió na necesidá d’acomuñar toos aquellos que creen na recostrución social, económica y nacional d’Asturies pa facer un frente ampliu pol futuru’l país
Podemos decir que cumplimos col nuesu oxetivu al presentamos a estes elleiciones, nes que yá sabíemos dende l’entamu que les condiciones yeren contraries dafechu y siendo coscientes del escenariu tan desigual nel que mos movíemos.
La nuesa presencia yera imprescindible pa que los asturianos tuvieren una opción d’espresar la so voluntá de votu dende una perspeutiva asturiana: ensin Andecha nun tendríen más opción de votu que’l votu español. Meyoramos el nuesu porcentaxe de votos en cuasi un 7%, siendo l’únicu partíu de izquierdes en medrar porcentualmente y también l’únicu estraparllamentariu en meyorar nesi sen, y eso foi posible gracias al fuerte compromisu de la nuesa xente, que dio la cara pa presentar y esparder el nuesu proyeutu, y a la llealtá de los nuesos votantes, que nun se dexen llevar poles promeses ermes de los partios españoles.
Sicasí, somos coscientes de que nel rangu de votos nel que mos movemos esi incrementu nun ye significativu, ya que nun mos da la oportunidá de llegar al nuesu oxetivu, que nun ye otru que representar nes instituciones al pueblu asturianu. Andecha Astur tien vocación de ser la ferramienta que faiga posible tresformar la situación que se carez n’Asturies, faciendo dende les istituciones una xera alternativo que se desmarque de la obediencia centraliega de los partios españoles, y nesi sen ye’l que tenemos qu’avanzar. Sabemos que n’Asturies hai un fuerte sentir soberanista qu’entá nun s’espeya nos resultaos elleutorales pero que ta ehí y nesi sen queremos ser un referente pa toos ellos; ye imprescindible qu’acomuñemos con toos aquellos que creen na recostrución social, económica y nacional d’Asturies pa facer un frente ampliu pol futuru’l país.
Per otru llau, los nuesos compañeros n’Agora Repúbliques si que medraron na so representación nel gobiernu del Estáu, lo que garantiza que la voz d’Asturies tará allí defendendo los drechos del pueblu asturianu, comu ya se va faciendo delles vegaes a travies de los diputaos de la coallición.
En términos xenerales, quedó espeyao nos resultaos el desencantu de los asturianos pa cola izquierda “reformadora” española, asina comu’l fuerte impautu que los medios de comunicación tienen a la hora de dar puxu a la estrema drecha y a la hora de tapecer y blanquiar tantu’l facismu comu la corrución.
