Presentada en Bruseles la denuncia a la UGT por fraude

El  Secretariu Xeneral d’Andecha Astur desixe una xusticia exemplar pa los que ficieron del “Principado” un réxime de corrución sistémica al empar qu’afirma que “el futuru d’Asturies nun pasa por poner la nuesa capacidá de decisión en manes d’organizaciones corrutes”

 Una dellegación d’Andecha Astur formada por Paulo Arboleya (Secretariu Xeneral d’Andecha Astur) y Mario Arbesú (miembru la Xunta Executiva Nacional) presentó en Bruseles, ente la Oficina Europea escontra’l Fraude (OLAF), una denuncia escontra’l sindicatu UGT por presuntu usu fraudulentu de los fondos europeos de formación pal emplegu, pidiendo al mesmu tiempu la suspensión cautelar de cualisquier sovención a la UGT. Na presentación de la denuncia acompangólos Pernando Barrena, eurodiputáu de la coallición Agora Repúbliques de la qu’Andecha Astur forma parte.

Paulo Arboleya señaló que’l casu la UGT ye ún más de los casos de corrución qu’afeuten a Asturies. Remembró, ente otros, los casos Riopedre-PSOE, Villa-SOMA, Niemeyer, El Musel, Aquagest, etc. Y resaltó la importancia de la sentencia que’l Tribunal Supremu emitió nel casu Riopedre-PSOE, onde s’afita que, dada la estensión d’estes práutiques, pue falase de que n’Asturies esiste una corrución sistémica.

La denuncia que se presentó ente la OLAF, en pallabres de Mario Arbesú, tien una importancia evidente: falamos de cómu un sindicatu, que nin ye asturianu nin socialista, apropióse presuntamente de más de 1’4 millones d’euros provinientes de fondos europeos destinaos a formación pal emplegu n’Asturies, ello ye, destinaos fundamentalmente a que los paraos y paraes asturianes meyoraren les sos posibilidaes d’emplegu

La denuncia presentá, comentó Mario Arbesú, va acompangá d’importante documentación na que s’afita que la UGT tien n’Asturies un entramáu d’empreses pantalla y fondaciones que-y permitieron elevar la faturación y evitar los controles, prevocando un gran quebrantu a les arques públiques.

Andecha Astur fae un llamáu a la ciudananía asturiana pa que blinde’l so drechu a decidir evitando qu’estes mafies corrutes controlen la Xunta Xeneral d’Asturies, pos sólo d’esta manera el nuesu pueblu podrá asegurar un futuru llibre y dignu pa toes y toos.