Artículu d’opinión de Llucía Fernández alrodiu la campaña mediática anunciando bayura de sovenciones europees por mor de la «descarbonización»
Nun sé si a vosotros vos tocó aguantar el cuentu la bona pipa, una tomadura de pelo cola que los mayores aburríen a la reciella la mio xeneración, prometiendo una hestoria que nunca llegaba … «¿Quiés que te cuente’l cuentu la bona pipa?» …»Yo nun dixe que sí, yo digo que si quies que te cuente’l cuentu la bona pipa…» y asina fasta l’infinitu y más pallá
La versión adulta d’esti cuentu tien dellos nomes, toos ellos asemeyaos; Reconversión, reindustrialización, recuperación… toos ellos acompangaos de promeses de perres vinientes de les mesmes manes que tarazaron la riqueza previa, perres qu’enxamás nun aporten a destín y que, nel casu asturianu, avecen quedar repartíes pente Madrí y les sempiternes redes clientelares que tan bien furrulen nel país.
Igual eso desplica la falta d’enfotu col que los asturianos recibimos la noticia de la porrada perres que prometen, agora pa la «reconversión enerxética», coles que van compensar, dicen, a los mineros asturianos pol preslle de les mines; un cuentu que yá mos suena, a fondos mineros, a gobiernu del PSOE, a perres perdíes.
Cien mil millones d’euros, cuasi ná, a repartir pente Asturies, Silesia, Macedonia y otres fasteres perxudicaes pol «cambeu» de fontes d’enerxía, cien mil millones de los qu’a los asturianos aportarán plizcos y sero, pero que por agora valen pa facer llaváu de cara y tenenos espeutantes una temporaina más. Comu nel cuentu la bona pipa. O el del burru tres de la cenadoria.
