Y de la responsabilidá del PSOE-SOMOS-IU nestos tiempos d’involución
Andecha Astur quier treslladar a la ciudadanía d’Uviéu’l so sintir de que’l poco más de mediu añu de gobiernu del tripartitu PP-Ciudadanos-Vox representa una involución importante con respeutu al modelu de xestión democrático y respetuoso cola nuesa identidá, cola diversidá, coles necesidaes sociales prioritaries y cola totalidá territorial del conceyu que defendemos.
Nos modos de gobiernu d’Alfredo Canteli y el so tripartitu pervese un regresu a los años escuros del municipalismu ramplón y mafiosu que representó Gabino de Lorenzo.
Uviéu carez un alcalde que…
- Nun estrema los presupuestos públicos de les cuentes privaes, cometiendo infraiciones cuntables al imputar gastos familiares comu propios de l’alcaldía.
- Entainó a beneficiar con sovenciones al so propiu clú social: el Centru Asturianu.
- Con mentires, convierte l’aición municipal nuna batalla escontra’l respetu a la diversidá, al retirar y repintar los bancos arcu iris de La Escandalera.
- Ye capaz de gastar presupuestos públicos nuna amuesa d’españolismu ranciu, prevocación y prepotencia, comu llantar el so gran banderolu español énte la Xunta Xeneral d’Asturies.
- Favorez los intereses de les clases privilexaes, desdexando l’atención a les necesidaes sociales más evidentes; poro, nun-y importa recortar un 25% les beques escolares, un 50% les inversiones n’emplegu, o tarazar les inversiones en barrios y fastera rural, al tiempu que xube los sueldos de los dirixentes municipales.
- Amosando lo que ye, repón arguyosu plaques de cais con nomes facistes, por un mandatu xudicial, eso sí, que consiguió la Hermandá de Defensores d’Uviéu.
Ési ye’l modelu de xestión que quieren PP, Ciudadanos y Vox pa Uviéu y pal restu d’Asturies.
Andecha Astur llamenta fondamente que la ciudadania d’Uviéu se vea afeutá poles polítiques involucionistes del nueu tripartitu. Pero, en tou casu, quier señalar que la responsabilidá d’esta situación nun ye sólo de los votantes del PP, Ciudadanos y Vox, sinón, en bona midía, tamién del tripartitu anterior, conformáu por PSOE, Somos ya IU.
PSOE, Somos ya IU, demientres gobernaron los destinos d’Uviéu, enxamás s’atrevieron a desendolcar polítiques bramente socialistes, que treslladaren a les clases populares el convencimientu de que yeren ellos los auténticos defensores de los sos intereses de clas. Les polítiques acomplexámente socialdemócrates, cuandu non simplemente lliberales, que punxeron en marcha nun permitieron que la xente d’esquierdes vienen nellos un referente pal futuru la ciudá.
PSOE, Somos ya IU punxeron en marcha iniciatives mal preparaes, unes vegaes por prieses (casu nomes de cais), otres vegaes por calmes inxustificaes (casu bulevar de Santuyano). Esa falta de llabor profesional permitió que la drecha baltiare namái llegar dalgunes de les iniciatives entamaes.
PSOE, Somos ya IU nunca nun desendolcaron polítiques propies pa la defensa la identidá asturiana, comu unes normatives municipales d’oficialidá, l’usu normalizáu del asturianu na vida municipal ya otres. De manera que, a nadie nun pue estrañar, que’l tripartitu de dreches siga’l mesmu camín: afitar n’Uviéu la identidá españolista, faciéndola más racia entá si ye posible.
El tripartitu que se pretendía d’esquierdes incumplió’l so programa elleutoral, priorizó polítiques de posturéu, esforcióse por colocar collacios nes cadarmes del poder, nun apostó por polítiques ñidiamente socialistes, prefirió siguir forxando un conceyu obediente a un modelu sociopolíticu y cultural españolista, continuó les vieyes polítiques llingüicides de minorización del asturianu…
PSOE, Somos ya IU son, por too ello, corresponsables de la involución qu’anguañu carez Uviéu.
Andecha Astur siguirá esforciándose pa que seya curtiu’l mandatu del tripartitu PP-Ciudadanos-Vox. Pero tampocu nun escaecerá la responsabilidá de los que permitieron la llegá d’estos tiempos d’involución.
