Denuncia la responsabilidá del gobiernu español y del “Principado” na espansión del coronavirus y llama a tolos asturianos a curiase y a prauticar el trabayu solidariu, l’andecha, p’aidar a los seutores más desprotexíos.
Énte la cris del coronavirus, Andecha Astur pide l’activación urxente de los servicios sociales, tantu los del “Principado” comu los de conceyu, pa que deteuten situaciones de desproteición en presones que viven soles o precisaes de curiaos, n’atención al fechu de que son munches les presones ensin redes rellacionales o de proteición y que son incapaces de consiguir por sigo mesmes los servicios más básicos.
Per otra parte, faemos un llamáu a quedase en casa pa protexer a los seutores más vulnerables, y remembramos a tola sociedá la necesidá de ser responsables y actuar en consecuencia, cumpliendo’l dictáu de les autoridaes sanitaries, asina comu a prauticar el trabayu solidariu, l’andecha, p’aidar a los más desprotexíos.
N’otru orde de coses, denunciamos la responsabilidá del gobiernu español nel agravamientu de la situación sanitaria n’Asturies, dexando, si non potenciando, que decenes de miles de presones con un altu potencial de contaxu -madrilanos especialmente- muévanse masivamente al nuesu país, favoreciendo l’espardimientu del virus.
Nesi sen, consideramos pergrave ya inresponsable l’actuación del presidente del “Principado”, Adrián Barbón, que n’almitiendo la necesidá d’aisllar Asturies pa contener el coronavirus, reconoz la so falta dafechu de competencies y non solo nun aislla a les poblaciones afeutaes pol ésodu de madrilanos, sinón que nin siquier toma precuros específicos con esa masa humano que se movió escontra les zones turístiques asturianes.
Una vegada más, el servilismu del gobiernu del “Principado”, xuníu a l’ausencia de competencies y de poder políticu, van salir bien caru al conxuntu los asturianos y asturianes.
Ello asina, denunciamos una vegada más la situación d’indefensión que carez Asturies, al escarecer de la soberanía político necesario pa dar rempuesta a les nueses propies necesidaes, y denunciamos el procesu recentralizaor de la Declaración d’Alerta aprobao pol gobiernu español, y les múltiples faltes y contradiciones de la mesma, aprobando dimposiciones comunes a territorios que s’atopen en situaciones sanitaries estremaes dafechu, como pue ser, ensin dir acullá, la de Madrid y la d’Asturies; nel primer de los casos con un porcentaxe de contaxu altu, y nel segundu siendo víctimes de la escorribanda ensin control d’aquella población.
A lo cabero, Andecha Astur quier estimar l’actuación de los profesionales de la Sanidá Pública Asturiana, qu’en sufriendo demientres décades polítiques d’abandonu y precarización llaboral y de medios, tán supliendo col so enfotu y compromisu la falta de medios humanos y materiales nuna situación d’emerxencia comu la que tamos viviendo.
