Andecha Astur pide a Barbón reflexón y retificación de la so política sanitario

Desixe garantíes de seguranza llaboral pa los sanitarios y l’atención integral de tolos pacientes asturianos

Estos díis escuchemos a Adrián Barbón bixordear de qu’Asturies siempres foi tierra solidario, ufriendo los hospitales asturianos p’acoyer enfermos de coronavirus d’otros territorios del estáu español. Ye cierto que n’Asturies préstamos ser solidarios y sómoslo davezu.

Sicasí, les asturianes y asturianos yá sabemos que’l presidente del “Principado” aveza xugar al buenismu pa tapecer dalguna otra cosa; y ye que Barbón nun quier que se fale agora sobro la eficacia o non de la so política sanitario, nin de si los fallos que se dan tienen o non responsables políticos.

El Gobiernu’l “Principado” ta engañando a la sociedá asturiana. La Sanidá Pública Asturiana nun cunta colos suficientes recursos básicos non yá pa garantizar la meyor atención mélica a los pacientes, sinón nin siquier pa dotar al presonal sanitariu de los materiales que-yos garanticen la necesaria preservación de la so salú. Los escelentes profesionales de la Sanidá Pública Asturiana denúncienlo de contino: nun hai suficientes mazcarines, equipaciones EPI, pantalles proteutores, tests deteutores… nin suficiente presonal sanitariu. Que dalgunos sanitarios tuvieren de trabayar improvisando proteiciones con bolses de basoria ye una rialidá tan heróica comu vergoñosa.

Trayer enfermos de coronavirus d’otros llugares del estáu, ensin garantizar primero los recursos suficientes y les condiciones xustes de seguranza llaboral, supondría multiplicar irresponsablemente’l riesgu qu’anguañu yá carez el presonal de la Sanidá Pública Asturiana.

Per otru llau, si la capacidá d’atención hospitalaria ye tala que-y permite a Barbón ufrir atención al esterior, el presidente’l “Principado” debería desplicar públicamente por qué entós tán en casa abondos enfermos declaraos a los que se-yos fae una atención a distancia, pero ensin drechu a ingresu hospitalariu y ensin contabilizar. Igual que debería desplicar los motivos polos qu’hai tantes presones mayores enfermes confinaes na rede xeriátrica, tamién ensin drechu a ingresu hospitalariu.

Esperamos que’l gobiernu d’Adrián Barbón calcule suficientemente’l riesgu de les sos anuncies. Persábese que los datos oficiales d’enfermos y fallecíos nun son riales. N’Asturies, y en tol mundiu, hai munchos enfermos con síntomes non graves que tán en casa y nun cunten nes estadístiques oficiales.  Ye más, tamién el númberu d’enfermos ye dafechamente irreal porque’l gobiernu’l “Principado” nun tien los tests necesarios non yá p’atender a la población asturiana que lo necesite, sinón p’asegurar el necesariu control de contaxos ente presonal sanitariu y curiaores de tou tipu (hospitales, atención primaria, tresporte sanitariu, residencies de tercer edá, curiaores a domiciliu…).

Aconseyámos-y al presidente Barbón que, enantes de siguir faciendo declaraciones al por mayor, tenga en cuenta les alvertencies de la Organización Mundial de la Salú, cuandu notifica al estáu español que sólo col confinamientu nun va reducir la curva de muertes por coronavirus. Y, en consecuencia, afita que si nun s’ataya la cris con una política integral (prebes de deteición, rastréu de contautos, cuarentena y distanciamientu social, dotación suficiente de la sanidá, etc.) nun se llogrará acabar cola pandemia.

Y, comu’l señor Barbón ye cosciente de que l’estáu español nun ta aplicando esa política integral pa forciar l’andancia, nin lo ta faciendo’l gobiernu d’Asturies, pos ye llaceriosamente previsible que la cris sanitario n’Asturies entá nun algamó’l so picu de gravedá.

Esa previsión tamién tien de tenese presente cuandu se planifica l’aición inmediata na política sanitario. Nun vaiga pasar, dicho con pallabres llanes, que Barbón seya comu ún d’esos paisanos, qu’a lo grandono, quier pagar una ronda pa toos cuandu nun tien pa pagar lo d’en casa.

Porque, alcuérdese’l señor Barbón, enantes de que vusté pudiere echar la culpa de l’actual cris sanitaria al coronavirus, lo que mos ufiertaba’l PSOE yera la mutilación de la sanidá público qu’aconseyaben les polítiques ultralliberales del FMI y la UE: recortes presupuestarios, salarios insuficientes, derivación de pacientes a centros sanitarios non públicos, falsiamientu de les llistes d’espera, penosa cobertura d’ausencies, permisos y vacaciones, recorte plantilles, mengua grave del númberu mélicos sobro too en delles especialidaes, aumentu risible de les places pa estudiantes na Facultá Melecina, cantidá ruina de places de formación MIR nos hospitales asturianos, falta de política dala p’atayar la influyencia de la industria farmacéutico sobro l’actividá de la sanidá público, etc.

Andecha Astur creye que sí ye posible aperiar dende Asturies y p’Asturies polítiques ñidiamente comprometíes col futuru la nuesa sanidá público. Poro, enantes de la cris del coronavirus, la campaña de defensa de la Sanidá Pública Asturiana yera’l llabor prioritariu de la nuesa organización. Por eso tamién encamentamos al gobiernu’l “Principado” que prautique la reflexón y la retificación de lo fecho fasta agora.