La coallición Agora Repúbliques de la que forma parte Andecha Astur, pide a la Comisión Europea qu’aborde la cris del Covid19 dende un puntu vista européu y basándose na universalidá, y la solidaridá.
Plantégase como primer midía’l confinamientu y el preslle paneuropéu de la produición y la rialización de tests masivos a la población, atalantando que la prioridá tien de ser salvar vides y la salú de la ciudadanía, y pa minimizar l’impautu económicu y, l’aplicación de midíes estrictes dende l’entamu, considerando fundamental evitar les competencies deslleales y oportunistes.
Nesi sen, pídise la ellaboración de datos concretos y fiables a nivel européu, que permitan conocer tola dimensión de la cris y poder faer frente a situaciones asemeyaes nel futuru; la complementación de la reserva estratéxica d’equipamientos sanitarios -el rescXU-, pa faer frente a la escasez de material que ta dándose n’estremaos territorios.
Per otru llau, nel ámbetu económicu y social, considérase qu’el fondu de 100.000 millones d’euros, especialmente empobináu a los trabayaores de los países afeutaos anunciáu pola Comisión Europea, ye insuficiente pa les necesidaes, proponiendo que los fondos d’estabilidá tienen de situase perriba los 400.000 millones d’euros pa faer frente a les grandes dificultaes a les que tendrá qu’enfrentase la ciudadanía europea.
Asina mesmo, Agora Repúbliques pidió a la Comisión Europea la puesta en marcha d’una renta mínima europea pa que toles presones faigan frente a los problemes d’emplegu que vaigan xenerándose y respuender asina a los colleutivos más vulnerables. Nesi sen considérase que ye hora de que les istituciones europees aborden la reforma de la política fiscal; hai que recaldar pa tener recursos abondos pa polítiques públiques fuertes y redistribuidores, y pa ello ye fundamental que les grandes riqueces y multinaciones apurran muncho más de lo que fain anguañu, trátase de que faiga mayor esfuerciu quien más tien.
Amás, Agora Repúbliques pidió al Conseyu Européu que ponga en marcha midíes económiques basaes na solidaridá, al traviés de “coronabonos” na llinia de lo aprebao nel postrer plenu del Parllamentu Européu.
Trátase de qu’esta cris vala pa concenxar de la importancia d’invertir en servicios públicos y de protexer los seutores estratéxicos de produición.
Asina mesmo, Agora Repúbliques anuncia que siguirá de cerca la situación de confinamientu, y los intentos de restrición de llibertaes que tan dándose, como nel casu d’Hungría, Eslovenia y l’Estáu español, onde tan dándose pasos importantes na militarización.
A la fin, otru aspeutu que quinxo destacar Agora Repúbliques ye la situación de les presones refuxaes. Los campamentos onde malviven nes islles griegues tienen de ser evacuaos, pero non solo pa reasitialos na Grecia continental, sinon afitando’l sofitu de la Xunión Europea y d’otros Estaos miembros. Sobro tou en casos de presones con problemes de salú. Pero esti cambiu de llugar ye imprescindible, darréu que yá apaecieren los primeros casos, y la cuarentena y caltener la distancia social ye imposible nestos campamentos.
