Prepárase un esperimentu de coste cero col escolináu más indefensu y col profesoráu, mentes Barbón y el «Principado» achanten y consienten
Si los indicaores sanitarios lo permiten, el 11 mayu declararán a Asturies en Fase I del procesu desescalá. Entós reabriránse los centros educativos, esa reapertura prepárase en Madrid de manera secreta y escura. Naide nun recibe información dala.
Na Fase I “los centros educativos abrirán pa la so desinfeición, acondicionamientu y el trabayu alministrativu y preparatoriu de los docentes y presonal ausiliar”. Y na Fase II dase la “apertura d’Infantil fasta 6 años pa families qu’acreíten que los proxenitores tienen de facer un trabayu presencial ensin posibilidá de flesibilización. Siempres con llimitacion d’aforu”.
El 25 mayu, si Asturies entra na Fase II, habrá neños nos centros d’Infantil de 0-3 y de 3-6 años. Pero nin l’agora gobiernu imperial de Madrid nin la cancillería obediente de Barbón despliquen en qué condiciones. Ye normal que families y profesoráu quieran negociar una torna con garantíes educatives, profesionales y sanitaries.
Nun se quier pasar test Covid19 al profesoráu. Nun se garantiza que les escueles tengan material preventivu (guantes, mascarines, xeles, termómetros por infrarroxos…).
Nin Madrid nin Barbón s’atreven a espublizar istruciones oficiales que regulen la rellación espaciu/presona, ratios educatives, convivencia del escolináu, usu d’espacios escolares compartíos, desinfeición de materiales comunes, etc. Tienen qu’esclariar si los neños deben guardar distancia ente sí, llevar guantes y mascarina, xugar xuntos, compartir recursos, salir al patiu, usar los parques infantiles del patiu, si se pue coyer a un escolín, si’l profesoráu tien d’usar ropa y calzao de proteición, si hai que desinfestar materiales ya istalaciones demientres la xorná escolar, si se comprebará la temperatura corporal al entrar n’escuela, qué se fae si un neñu tien fiebre a media mañana, cómu un mesmu mayestru atiende a los neños que tien n’escuela y a los que tien a distancia, qué xeres facer na clas dao que nun se pue avanzar materia curricular, por qué se reconvirtió un sirviciu educativu n’otru puramente asistencial, etc.
Pa un mes que queda d’enseñu presencial los neños de 0-6 años son l’escolináu menos afayaízu pa esperimentar qué asocede cola reincorporación a les aules. ¿Por qué los pasen de la mayor proteición al másimu riesgu?
El gobiernu de Barbón, magar que tea cómodu na incompetencia na que lu dexó l’estáu d’allarma, tien de desixir la suspensión fasta setiembre del enseñu presencial y, mentantu, la negociación coles confederaciones d’AMPES y los sindicatos del enseñu, la facilitación de recursos suficientes y normatives ñidies pa la prevención sanitario.
Si los sindicatos del enseñu y/o les AMPES tienen de convocar una fuelga comu rempuesta al secretismu ya irresponsabilidá de los dos gobiernos, sabremos comprendelos y sofitalos. Porque la Escuela Pública Asturiana, comu la sanidá, ye una prioridá pal futuru d’Asturies.
