Andecha Astur lleva a fiscalía la ocultación de documentación d’inmatriculaciones de la ilesia católica

Responsabiliza de la ocultación del catálogu de bienes inmatriculaos n’Asturies pola ilesia católica, al presidente del gobiernu del “Principado”, a la conseyera de Cultura, Política Llingüística y Turismu, y a la Conseyera de Presidencia del “Principado”

La denuncia básase na ocultación del catálogu completu de bienes inmatriculaos n’Asturies pola Ilesia católica –que recueye 553 inmuebles-, ellaboráu pol Colexu Rexistraores d’Asturies y entregáu pol so Decanu al Gobiernu del “Principado” en fecha 10 d’abril de 2019.

Como se recordará, Berta Piñán, Conseyera de Cultura Política, Llingüística y Turismu, nes comparecencies del 27 febreru y 4 de marzu de 2020 ocultó la esistencia d’esa documentación, y presentó un vieyu llistáu con unos 26 bienes inmatriculaos.

Énte les reclamaciones habides, Rita Camblor, Conseyera de Presidencia del Gobiernu asturianu afirmó que yá remitiere el citáu catálogu a la Xunta Xeneral demientres la primavera de 2019, a lo que salió al pasu el Lletráu Mayor de la Xunta Xeneral confirmando por escrito que dichu catálogu reclamáu nun fuere remitíu en dengún momentu a la Xunta Xeneral pol Gobiernu asturianu.

Finalmente el 14 de mayu de 2020 el gobiernu asturianu, fexo entregada a la Xunta Xeneral del citáu catálogu.

Ello asina, dende’l 10 d’abril de 2019 fasta’l 14 de mayu de 2020 el Gobiernu asturianu caltuvo ocultu’l citáu catálogu, negando la so esistencia y posesión incluso cuando foi requeríu reiteradamente pa la so entrega por diputaos de la Xunta Xeneral del “Principado”

Ye por ello, polo qu’Andecha Astur, acoyéndose a la Llei Orgánica 10/1995 de 23 de payares del Codígu Penal, Llibru II sobro Delitos y les sos penes, llevó’l presente casu a Fiscalía, por un supuestu delitu d’ocultación de documentos, cometíu por Adrián Barbón, na so condición de presidente del Gobiernu del “Principado”, por  Berta Piñán, na so condición de conseyera de Cultura, Política Llingüistica y Turismu de dichu gobiernu y por Rita Camblor, na so condición de Conseyera de Presidencia del mesmu gobiernu.