Andecha Astur propón a la Xunta Xeneral una declaración istitucional sol futuru d’EHBI

Recuerda qu’el futuru de la empresa ta dafechu en manes de los gobiernos asturianu y español

Andecha Astur presentó na Xunta Xeneral d’Asturies una propuesta pa qu’aprebe con urxencia una Declaración Istitucional sol futuru de la empresa EBHI, lo mesmo que fexo con otres empreses en situación de conflictu llaboral.

Nesa Declaración Istitucional remembraríase que la empresa tien participación pública, al ser l’Autoridá Portuaria de Xixón aicionista mayoritariu. Y cómu, al empar, el Comité d’Alministación de l’Autoridá Portuaria ta controláu pol gobiernu español y l’asturianu. De mou que dambos gobiernos (en manes de PSOE y Podemos) son los responsables de lo qu’asocede na EBHI, y puen marcar direutrices nel Conseyu d’Alministración d’esta empresa dedicá al movimientu portuariu de graneles sólidos.

La propuesta de Declaración Istitucional que presentamos recueye les vindicaciones del colleutivu trabayaores d’EBHI, qu’agora ta en fuelga indefinío y con cuatru compañeros que lleven yá 22 díes en fuelga fame.

La propuesta d’Andecha Astur fina con cuatru determinos que se convida a tomar a la Xunta Xeneral d’Asturies:

1. Encamentar a EBHI pa que cumpla cola tasa reposición del 100% que ye posible na empresa, collaborando a garantizar n’Asturies el drechu al trabayu.
2. Solicitar al Gobiernu d’Asturies y al español qu’entamen cola Autoridá Portuaria de Xixón les xestiones necesaries pa qu’ésta faiga valir la so condición d’aicionista mayoritariu na EBHI, consiguiendo del so Conseyu d’Alministración el cumplimientu de la tasa reposición del 100%.
3. Encamentar a EBHI pa que na so xestión, comu empresa de participación pública que ye, amuese’l compromisu necesariu col nuesu país y, especialmente, colos trabayaores que nella presten sirvicios.
4. Sofitar incondicionalmente’l seutor de los terminales de graneles sólidos con participación pública en Xixón y a los sos trabayaores.

Creyemos qu’esta propuesta de Declaración Istitucional ye un documentu de mínimos sol futuru d’EBHI y pue aidar a salvar el so futuru, agora condicionáu tanto pola renuncia a cubrir el 100% de la tasa reposición comu pola actitú de la empresa de nun presentase a tolos contratos posibles de movimientu de graneles sólidos n’El Musel, dexando una parte de l’actividá llaboral nel seutor en manes d’empreses privaes.

Los grupos parllamentarios qu’ocupen escaños na cai Fruela nun deberíen atopar problemes p’amosar una posición unánime al rodiu d’esta propuesta, porque la Xunta Xeneral yá aprebó Declaraciones Istitucionales pa defender el futuru la planta d’Alcoa n’Avilés y n’otres ocasiones en qu’Asturies carecía conflictos llaborales d’importancia. Hai de tener en cuenta, amás, que nesti casu la solución ye entá más cenciella: nun depende de los intereses d’un empresariu priváu, sinón que ta sólo nes manes del gobiernu asturianu y l’español.

Per otru llau, llamamos al pueblu asturianu a participar güei nel manifestamientu que los trabayaores d’EBHI convoquen en Xixón, a les 19’30 h., asina comu en toles aiciones de sofitu al colleutivu de trabayaores d’EBHI en llucha. ¡EBHI solución!