“Va cumplise un mes dende qu’entamó la fuelga fame de los compañeros d’EBHI, y el presidente del gobiernu d’Asturies, Adrián Barbón nun da la cara”
Con estes pallabres entama’l vidiu col que Mariu Arbesú, en representación d’Andecha Astur, unvía un mensaxe de sofitu a los trabayaores d’EHBI “y al restu de la xente solidario d’Asturies”, denunciando’l silenciu del “Principado” a la propuesta d’Andecha Astur pidiendo una Declaración Istitucional sol futuru de la empresa EBHI, lo mesmo que fexo con otres empreses en situación de conflictu llaboral y entrugándose “qu’intereses privaos y económicos, qu’intereses ocultos hai detrás” que xustifiquen esa diferiencia de tratu.
Ello asina, desixe a Adrián Barbón “que dexe d’escondese. Facémoslu responsable de tar convirtiendo un conflictu llaboral nun conflictu social y políticu, poniendo en riesgu la salú de los trabayaores en fuelga fame”.
Na intervención tamién recordó qu’Andecha Astur fexo una entruga al gobiernu d’España pidiendo desplicaciones pol comportamientu de la empresa -de mayoría pública, nun hai qu’escaecelo- “al traviés de la coallición Agora Repúbliques de la que formamos parte”, tando a la espera d’una rempuesta del mesmu, y fina la intervención reiterando’l compromisu y el sofitu de la organización a los compañeros d’EBHI na so llucha en defensa de los puestos de trabayu.
