Andecha Astur pide responsabilidaes pol esbarrumbu del horru de Vis y demanda la so recostrución

Andecha Astur pidi a la Presidencia’l Gobiernu d’Asturies, a la Conseyería de Cultura y al alcalde d’Amieva l’esclariamientu de responsabilidaes polítiques y alministratives pol esbarrumbu .

 Asina mesmo, demanda la recostrución del mesmu en base a los materiales restantes

L’esbarrumbu por ruina foi posible porque los dueños del horru, l’Alcalde d’Amieva, la Conseyera de Cultura, Política Llingüística y Turismu, el Direutor Xeneral de Cultura y Padremuñu y el Xefe’l Sirviciu de Proteición, Conservación y Difusión del Padremuñu Cultural incumplieron gravemente les sos obligaciones llegales en materia de conservación del padremuñu asturianu. Poro, Andecha Astur pide que la Presidencia’l Gobiernu entame un espediente d’investigación pa determinar les responsabilidaes de toos ellos.

L’Horru de Vis yera una ayalga ente los horros y paneres d’Asturies pola so antigüedá y pol valir artísticu ya hestóricu que representaba la so decoración con pintures del llevantamientu n’armes d’Asturies escontra les tropes d’ocupación franceses, al empiezu’l sieglu XIX. Esti estilu decorativu, conocíu comu “La Francesá”, ta presente sólo nun puñaín d’horros y paneres del país. L’Horru de Vis yera’l más valiosu pola bayura ya interés de les sos pintures. Poro, dende 2018 taba incluyíu nel Inventariu de Padremuñu Cultural d’Asturies y protexíu pola Llei del Padremuñu Cultural (2001) y pol so Reglamentu (2015).

Les alministraciones asturiana y llocal persabíen que l’Horru de Vis taba en 2018 nuna situación prerruinosa y que necesitaba aiciones urxentes pa la so conservación. Porque, cuandu s’inclúi nel Inventariu de Padremuñu Cultural, la Conseyería almite nel BOPA que “l’estáu xeneral de conservación ye deficiente” y “considérase prioritario la toma midíes urxentes pa la so conservación y caltenimientu”.

Al empar, Andecha Astur pide que se faiga pública documentación importante pal casu: catalogación urbanística municipal del Horru de Vis comu bien inmueble d’especial interés, actes de les ispeiciones de control que se fexeron al inmueble, informes sol estáu de conservación del horru, propuestes de midíes urxentes pa la so conservación por menacia de ruina, emisión d’órdenes a los propietarios pa executar actuaciones de conservación del bien protexíu, etc.

Y pídese que’l gobiernu publique informaciones equivalentes sol restu los bienes protexíos del nuesu padremuñu, pa poder valorar si tán faciendo, comu col horru, una dexación dolosa de les sos responsabilidaes llegales.

Asina mesmo, demándase la recostrución de dichu horru en base a los materiales restantes del so esbarrumbu, siguiendo estrictos criterios científicos y profesionales.

Los partíos españoles que mos gobiernen quien convencemos de que la perda del nuesu padremuñu cultural ye un procesu ñatural inevitable. Cuandu ellos tienen la obligación llegal y los medios científicos y téunicos pa caltenelu vivu, comu amuesa pervaliosa que ye de la nuesa identidá.  Una preba de lo que quien: dexaron morrer l’Horru de Vis y tantos otros bienes valiosos, pero sovencionen artificialmente les matances de toros o les Feries d’Abril n’Asturies. El so oxetivu ye minusvalorar la identidá y la cultura asturiana y sostituyila sele por un modelu cultural ayenu.

La perda del Horru de Vis ye un símbolu de cómu se maltrata y castiga la identidá y cultura asturiana. Hai responsables políticos y tienen d’encariar les consecuencies.