Foi útil la fuercia de los veceros, del seutor y de cuantos lu defendimos
Reiteramos al Conseyu Regulaor de la IXP y a la Conseyería de Sanidá la necesidá de que compreben qu’Alimerka cumple lo anunciao
Alimerka viose na necesidá de tornar a firmar contratos estables colos cebaeros de la Indicación Xeográfica Protexía Xata Asturiana, que frañere unillateralmente hai poco. Abandonando asina al seutor, Alimerka quedó en situación de gran debilidá, porque’l so cebaeru sólo-y consigue’l 25% de la Xata Asturiana que vende; de mou que p’atender l’otru 75% les ventes sólo podía trayer carne foriato. Agora, tres la presión social que menaciaba les sos ventes, la empresa torna dicir que namás va vender carne de Xata Asturiana.
Valoramos útil la nuesa intervención nel conflictu con qu’Alimerka traicionaba la IXP, porque collaboremos na presión social que, al acabu, iguó’l conflictu. Pidimos la intervención urxente del Conseyeru de Mediu Rural y Cohesión Territorial, que se produxo. Contautemos colos ganaeros pa recoyer información y da-yos sofitu. Y entamemos una campaña pública encamentando a los veceros un control firme de la carne d’Alimerka, refugando que se-yos vendiere carne foriato comu Xata Asturiana.
Que la presión social y el riesgu de perda veceros llevó a Alimerka a retomar la contratación nel seutor deduzse ñidio de la nota informativa que’l presidente unvió a los trabayaores. Nella hai una primer parte común cola noticia que dictó a los medios de comunicación sovencionaos. Pero nuna segunda parte, non espublizá, evidencia que los intereses económicos de la empresa y el créitu social que-y podía quedar tuvieron en riesgu.
Andecha Astur considera un drechu social defendese de les empreses que caltienen posiciones hexemóniques nel mercáu (Alimerka comercializa cuasi’l 50% de la IXP Xata Asturiana), cuandu primen los sos beneficios al tratu xustu a un seutor productivu fundamental n’Asturies.
Andecha Astur pidi a la Conseyería de Mediu Rural y Cohesión Territorial que regule la rellación produción-comercialización pa torgar nel futuru conflictos d’esta triba, que pongan en riesgu los seutores productivos básicos d’Asturies.
Tamién reiteramos al Conseyu Regulaor de la IXP y a la Conseyería de Sanidá que compreben qu’Alimerka cumple lo anunciao, ufriendo nos supermercaos sólo Xata Asturiana y faciendo un usu llegal y correchu de los símbolos y cartelería d’esta IXP. Lo mesmo que siguimos convitando a los veceros a controlar que nun seyan vítimes de práutiques engañoses o fraudulentes, asegurándose de que se-yos ufre Xata Asturiana cuandu lo demanden.
