Andecha Astur remembra’l so pidíu d’una investigación interna y de facer pública la documentación sobro proteición del pradremuñu protexíu
Dende hai unos díis la Conseyería de Cultura ye culpable, xunto colos dueños del inmueble y el Conceyu d’Amieva, del esbarrumbu por ruina del míticu Horru de Vis, una ayalga del padremuñu cultural asturianu, protexía pola llexislación vixente nesta materia.
Que la Conseyería de Cultura venga agora de constituyir la Mesa l’Horru ye sólo’l disimulu reconocible d’un culpable con mala concenxa.
La Llei de Padremuñu Cultural d’Asturies y el Reglamentu que la desendolca, vixentes dende hai años, recueyen fonciones, competencies y medios claros pa que l’Alministración asturiana y les municipales caltengan el padremuñu incluyíu nos catálogos oficiales de proteición. La Mesa l’Horru, de la que se lleva falando cuantayá, taría bien comu marcu de participación social, magar que persabemos que’l PSOE enxamás nun facilita ésta d’un mou real y democráticu; mesmamente la mayoría los sos miembros son parte l’alministración. Pero la Mesa l’Horru nin ye imprescindible pa caltener el padremuñu asturianu, nin pue sirvir d’escusa a los responsables del Gobiernu pa nun cumplir les obligaciones que por llei yá tienen encomendaes, nin pue usala la conseyera comu llaváu de cara pa facer creyer que ta faciendo dalgo.
Ye mentira: el Gobiernu asturianu y la mayoría les Cases Conceyos nun tán cumpliendo les obligaciones que-yos marca la Llei de Padremuñu Cultural d’Asturies y el so Reglamentu.
Pero la conseyera, Berta Piñán, pemítese rise de tolos asturianos publicitando que la Mesa l’Horru sedrá mui importante por que “tendrá de tomar determinos relevantes comu si tienen que depender de Padremuñu los horros nueos o si l’horru nueu sigue siendo horru”, testual.
Los nueos nun sabemos, pero los horros vieyos, ayalgues protexíes pola llei, nun van depender de Padremuñu porque Berta Piñán y Adrián Barbón tán cometiendo’l delitu (lliteral y xurídicamente falando) de dexar qu’esa seña d’identidá del paisax asturianu se destruya pol incumplimientu les sos fonciones.
Énte esta situación doliosa, Andecha Astur desixe a la Conseyería Cultura que dexe de pacer política de marketing en materia d’horros, paneres y cabazos y que se ponga darréu a cumplir la llei qu’agora tán incumpliendo ñidiamente.
Y, comu fuimos la primer organización en tomar postura pública sol esbarrumbu del Horru de Vis, y la única en desixir midíes concretes, considerámosmos con drechu a remembrar al Gobiernu d’Asturies que tien ensin retrucar la demanda que-y ficimos d’abrir una investigación interna sobro esti escándalu, tien pendiente de facer pública la documentación que-y reclamemos pa comprebar la xera fecha pola Alministración en materia de proteición del padremuñu; y entá nun tomó denguna midía pa a proceder a llevantar de nueu l’horru de Vis, siguiendo estrictos criterios científicos y profesionales, talamente como demandó Andecha Astur.
