Andecha Astur de Xixón propón camudar el nome de la Avenía Juan Carlos I

Propónse comu alternativa “Avenía de la Sanidá Pública Asturiana”, conforme la iniciativa apaecía reiteradamente en Redes Sociales

Andecha Astur de Xixón vien de presentar una propuesta a la Casa Conceyu de Xixón una propuesta na que tres faer un piqueñu analís al currículum de Juan Carlos I, espón que “siendo Xixón, por llarga tradición hestórica, un llugar asturianu y obreru amante de la democracia, de la exemplaridá cívica y de la igualdá ente la ciudadanía, asina comu un llugar querenciosu siempres de la memoria hestórico y de modelos sociales de progresu”, y en tantu “que la Casa Conceyu de Xixón diz tar goberná por una mayoría progresista d’esquierdes conformá por PSOE ya IU, y que pue cuntar col sofitu de Podemos, de xuru-y resultará cenciello compartir los argumentos espuestos y, darréu, tomar el determín democráticu que pidimos; qu’amás ye un pidíu que recoyemos del sintir popular espresáu ñidiamente na cai y nes redes sociales”.

Ello asina, propónse camudar el nome de “Avenía de Juan Carlos I”, pola de “Avenía de la Salú Pública Asturiana”, n’homenax a los méritos amosaos pol presonal sanitariu del nuesu país demientres l’andanciu prevocáu pol CORONAvirus.

Darréu amestamos el conteníu de la propuesta:

PRIMERO.- Que na ciudá de Xixón, nel territoriu correspondiente al códigu postal 33212, esiste la conocía comu “Avenía de Juan Carlos I”, una vía con cuasi tres kilómetros de llargor, que va dende la Cai Marqués de San Esteban fasta’l barriu de La Calzá.

SEGUNDO.– Que’l ciudadanu Juan Carlos Alfonso Víctor María de Borbón y Borbón, conocíu col nomatu de “Juan Carlos I” y con DNI 00000010, vieyu ocupante del títulu de rei español, heredó’l puestu de xefe del Estáu español direutamente del dictaor facista Francisco Franco Bahamonde, ensin tener pasao enxamás por denguna votación democrática.

TERCERO.- Que del ciudadanu conocíu comu Juan Carlos I, amás de ser herederu direutu del franquismu, custiónase davezu la so supuesta fidelidá democrática nel golpe d’estáu facista de 1981, protagonizáu pol teniente coronel de la Guardia Civil Antonio Tejero y pol xeneral Alfonso Armada y Comyn, es-Secretariu de la Casa Rial española y segundu xefe del Estáu Mayor del exércitu español.

CUARTO.- Qu’amás, comu ye público y notorio, Juan Carlos I presenta un curriculum vergoñosu en cuantes a presuntu tráficu d’influyencies, cobru comisiones, ocultación de padremuñu monetariu, evasión fiscal y otros presuntos delitos, motivos polos que fasta’l so fíu, el ciudadanu Felipe Juan Pablo Alfonso de Todos los Santos de Borbón y Grecia, conocíu col nomatu de “Felipe VI”, fae esfuercios riales por separtase del so nome, estirpe y responsabilidaes.

QUINTO.- Que la ciudá de Xixón ye, por llarga tradición hestórica, un llugar asturianu y obreru amante de la democracia, de la exemplaridá cívica y de la igualdá ente la ciudadanía, asina comu un llugar querenciosu siempres de la memoria hestórico y de modelos sociales de progresu.

SESTO.- Que tolos fechos asoleyaos indiquen que lo más razonatible, xusto y democrático ye que na ciudá de Xixón nun hebia dengún elementu urbanísticu que sirva de remembranza y homenax a un presonax comu l’enantes señaláu.

SÉTIMO.- Que, dao que la Casa Conceyu de Xixón diz tar goberná por una mayoría progresista d’esquierdes conformá por PSOE ya IU, y que pue cuntar col sofitu de Podemos, de xuru-y resultará cenciello compartir los argumentos espuestos y, darréu, tomar el determín democráticu que pidimos; qu’amás ye un pidíu que recoyemos del sintir popular espresáu ñidiamente na cai y nes redes sociales.

De mou que, pola importancia de tolo enantes desplicao y pola necesidá evidente de caltener una convivencia ciudadana en condiciones de coherencia, dinidá y democracia,

SOLICITA:

Que la Casa Conceyu de Xixón considere nuna sesión plenaria la necesidá y procedencia de camudar el nome de la “Avenía Juan Carlos I”, proponiendo comu alternativa’l nome de “Avenía de la Sanidá Pública Asturiana”, n’homenax a los méritos amosaos pol presonal sanitariu del nuesu país demientres l’andanciu prevocáu pol CORONAvirus.

Que la Casa Conceyu facilite a quien esto robla información sobro la tramitación del pidíu que se presenta.

En Xixón, a 9 de xunetu de 2020.