La conocía comu Casa Blanca, na Plaza l’Istitutu (Xixón), que foi sé del Conseyu Soberanu d’Asturies y Lleón en 1937, sigue ensin placa dalguna que señale la so condición d’edificiu fondamental na hestoria d’Asturies.
Andecha Astur propunxo hai años a la Casa Conceyu de Xixón que, aprofitando una reforma urbanística de la plaza qu’entós se diba entamar, afitare nella un pequeñu monumentu que sirviere d’alcordanza al Conseyu Soberanu d’Asturies y Lleón, que, presidíu por Belarmino Tomás, tuvo ellí la so sé dende’l 24 d’agostu al 20 d’ochobre de 1937, foncionando comu gobiernu d’una Asturies socialista ya independiente. La rempuesta del Conceyu Xixón foi entós ñegativa.
Darréu, en varies ocasiones Andecha Astur colocó nel edificiu plaques que remembraben la importancia hestórica del mesmu, pero toes elles desapaecieron aína. Igualmente Andecha homenaxeó varies vegaes el papel que l’edificiu representa na memoria hestórica d’Asturies: con ofrendes florales, con discursos que rellataben la so importancia, o dándolu a conocer a los diputaos, senaores y parllamentarios europeos de la nuesa coalición Agora Repúbliques (con representación nel Congresu y Senáu españoles y nel Parllamentu Européu).
La Casa Blanca non sólo ye un edificiu d’indiscutible valor hestóricu, sinón tamién de ñidiu interés arquiteutónicu, pos ye una costrución bien representativa del Art Decó racionalista. Les seyes plantes del edificiu llevantáronse con formigón armáu en 1934, acordies colos planos de dos arquiteutos pernomaos: Manuel del Busto y el so fíu Juan Manuel del Busto.
Siendo Xixón una ciudá que fae por reconocer la so hestoria y por dar valor, visibilidá y reconocencia al so padremuñu hestóricu y cultural, ye inconcebible que la sé del Conseyu Soberanu d’Asturies y Lleón siga siendo un edificiu non sólo non reconocíu, sinón ocultáu na ciudá. Si l’edificiu nun tuviere la sinificancia hestórica que tien, sedría dende hai munchos años un bien catalogáu y protexíu pol so propiu valor arquiteutónicu. Preba d’ello ye que les otres costruciones debíes a Manuel del Bustosí tán catalogaes y protexíes pol Conceyu Xixón. Poro, ye precisamente lo que representa hestóricamente l’edificiu (una Asturies llibre y socialista) el motivu pol que ta castigáu a la escuridá, al silenciu y al abandonu istitucional.
Poro, teniendo en cuenta qu’anguañu la Casa Conceyu de Xixón cunta con una composición política que se diz progresista, abanderá de la xusticia social, partidaria de caltener la memoria hestório y de reconocer el padremuñu la ciudá, con una mayoría conformá por PSOE, IU y Podemos, Andecha Astur acaba presentar a la Casa Conceyu una propuesta bien completa, que pretende salvar la esistencia y la memoria d’esti edificiu. La propuesta costa de seyes iniciatives:
- Incluyir l’edificiu conocíu comu la Casa Blanca, na Plaza l’Istitutu, nel inventariu municipal de bienes protexíos pol Catálogu Urbanísticu de Xixón.
- Promover ente la Conseyería de Cultura que l’edificiu seya declaráu Bien d’Interés Cultural pol Gobiernu d’Asturies.
- Precurar la conversión del edificiu en propiedá del Conceyu Xixón o del Gobiernu d’Asturies, pol so indiscutible interés hestóricu.
- Dotar al edificiu d’una placa que remembre que foi sé del Conseyu Soberanu d’Asturies y Lleón.
- Camudar el nome de la Plaza l’Istitutu pol de Plaza del Conseyu Soberanu d’Asturies y Lleón.
- Colocar na plaza un monumentu que remembre’l sinificáu ya importancia del Conseyu Soberanu de 1937 na hestoria d’Asturies.
Esperamos qu’una Casa Conceyu comu la de Xixón, cola composición política qu’anguañu tien, y col talante democráticu y querenciosu d’Asturies que diz tener, seya quién a llevar a la práutica les midíes propuestes, que son bien normales pa un publu que nagua por caltener la so memoria hestórico.
