Defensa de la República Asturiana frente a la monarquía española

La ponte de Cangues d’Onís convirtióse na postal política del añu en rempuesta a la visita de los Borbones a Asturies

Andecha Astur vien de facer en Cangues d’Onís, que foi la primer capital del Reinu d’Asturies, un actu políticu pa refugar que los Borbones se pasien per Asturies col únicu oxetivu de blanquiar la inmoralidá política y democrática de la monarquía española, pa tapecer la so condición d’herederos de Franco al traviés del réxime español de 1978.

Acompangaos por gaiteros y banderes d’Asturies, un garrapiellu militantes d’Andecha Astur xubió a la mítica ponte de Cangues d’Onís, amosando lletres xigantes que presentaben un mensax ñidiu, “REPÚBLICA ASTURIANA”, énte’l públicu numberosu del llugar.

Con esti actu quínxose resaltar trés vindicaciones que representen soluciones de futuru p’Asturies.

1. Vindicamos la llibertá de decisión político a la que tien drechu esta Asturies, a la que los partíos españoles impunxeron un “estatutu d’autonomía” que mos prohibieron votar.
2. Vindicamos los drechos sociollaborales y la xusticia social que merez esti país, desangráu demográficamente poles polítiques neolliberales de los gobiernos d’esa monarquía española.
3. Vindicamos la identidá de la nuesa nación, a la que se-y ñega la so hestoria política y la so llingua, a la que se-y mercantilicen los sos recursos ñaturales al empar que s’esprecia’l padremuñu hestóricu y cultural.

Con esti actu Andecha Astur xenera, amás, una imax bien sinificativa que compartimos nes redes sociales pa que pueda ser utilizá colleutivamente comu espresión gráfica del sentimientu nacional que balte n’Asturies: Asturies nun tien rei; Asturies ye nación; prúyemos una República d’esquierdes pa una Asturies llibre. Ési ye’l sinificáu que tien la semeya na ponte de Cangues d’Onís.

Pa finar, Andecha Astur llama a participar esti xueves na rempuesta social qu’un conxuntu ampliu d’organizaciones, axuntaes col llema “ASTURIES NUN TIEN REI”, vamos dar al paséu los Borbones pel nuesu país. Pa ello tenéis que tar sollertes a la convocatoria urxente que s’espublizará nes redes sociales.

¡ASTURIES NUN TIEN REI! ¡PUXA ASTURIES!