Nun actu xunitariu de l’Asturies que llucha pol futuru la nuesa nación
Mentantu Felipe VI y la so señora, familia d’autarques y lladrones españoles, pasiaben ayeri, xueves, pela Atalaya de Xixón, arrodiaos de policía y contemplando’l pegote formigón que la mafia del PSOE de Tini Areces malversó con Chillida a preciu monumentu, les asturianes y asturianos aconceyábense en Xixón nun actu de refuga a la monarquía española, nel que se quemaron públicamente cientos de semeyes de la familia de los Borbones, nun actu asturianu, popular, folixeru y mui participativu.
Convocaos por Andecha Astur, Anticapitalistes Asturies, Bloque Críticu, Centros Sociales d’Asturies, Comité pola Amnistía, Corriente Sindical d’Izquierda, Darréu y Federación Asturiana Memoria y República, cientos de ciudadanos aconceyáronse na plaza Xardinos del Náuticu (Xixón) pa denunciar una sola cosa: que’l paséu que n’aquellos momentos daben per Asturies el rei Borbón y la so señora paecía más que ná una terapia de blanquiamientu y un desfile d’autocomplacencia, pero con él la monarquía española quería facer comu que mos representa.
Y eso ye a lo que dende Andecha Astur y otres organizaciones asturianes quinximos retrucar alto y ñidio: Los Borbones nun mos representen. Asturies nun tien rei.
La monarquía española que nel sieglu XX impunxo n’Asturies un “Estatutu d’Autonomía” que mos torgó votar, ye la mesma antigualla antidemocrática que nel sieglu XIV mos castigó cola condición de “Principáu” p’asegurar que sedríemos los sos súditos.
Asturies nun tien rei. Asturies tien un pueblu honráu y trabayaor que nagua por un sistema políticu social, xustu y democráticu, onde la ciudadanía puea decidir con llibertá.
Los Borbones, aprovechándose de los sos privilexos políticos y xurídicos, cobren comisiones, trafiquen con perres, faen negocios secretos con rexímenes antidemocráticos, escuenden riqueces en paraísos fiscales, evaden impuestos…
¡Cómu mos van representar los Borbones si los sos gobiernos obliguen a esta Asturies de trabayaores a vivir una fondera cris económica y llaboral!
¡Cómu mos van representar!
Si tamién son los culpables de la emigración forciao d’una gran parte la nuesa mocedá, de les polítiques favoreceores del capital, de la esplotación de la clas trabayaora, de la llexislación que prime llibertaes públiques y polítiques, de la manga ancha pa la corrución, de la mercantilización de los nuesos recursos ñaturales, de la marxinación de la nuesa identidá cultural y llingüística… ¡cómu mos van representar!
Asturies nun tien rei porque defendemos el drechu la ciudadanía a poder votar la triba de sistema políticu que-y pruya y el marcu normativu que lu regule. Sicasí, ehí tenéis a los Borbones, xefes del Estáu español por desinación direuta del dictaor facista Franco Bahamonde. Ehí los tenéis, pasiándose per Asturies nun Mercedes de luxu y tan blindáu comu les sos responsabilidaes polítiques y penales, y sólo pola circustancia xenética de ser fíu’l so pá.
Les organizaciones convocantes pidimos ellí que los Borbones nun repitan más estos paseos de blanquiamientu y autoafirmación pelos pueblos del Estáu español, porque tres de sí namái dexen refugu y fedores decimonónicos y coloniales.
Pidimos l’entamu d’un alderique social y políticu fondu y democráticu sol réxime políticu del Estáu español, qu’empobine, ente otres consecuencies, al desaniciu la monarquía.
Pidimos una investigación política y xudicial de los presuntos delitos monetarios y fiscales cometíos polos Borbones, coles consecuencies penales y polítiques que seya mester.
Y, pa finar, pidimos una representación política que nun se comporte comu súditos de la corona española, sinón comu representación direuta y democrática del pueblu trabayaor. Asturies bien lo merez.
Igual que declararon con puxu los nuesos antepasaos en 1934, oponiéndose a la república española que los masacraba, … ¡Puxa la República Obrera y Campesina d’Asturies!
¡Asturies nun tien rei!
