Andecha Astur propón a la Xunta Xeneral cellebrar istitucionalmente la declaracion del Conseyu Soberanu’l 24 d’agostu de 1937

PSOE, IU y Podemos nun puen siguir ñegándose a incorporar el Conseyu Soberanu y al presidente Belarmino Tomás na recostrución de la Memoria Hestórica d’Asturies.

Andecha Astur vien de proponer a la Xunta Xeneral l’aprebación d’un conxuntu iniciatives pa reconocer y cellebrar istitucionalmente que na nuechi del 24 d’agostu de 1937 el Conseyu Interprovincial d’Asturies y Lleón determinó costituyise en Conseyu Soberanu d’Asturies y Lleón, asumiendo plena xurisdición y responsabilidá nel gobiernu civil y militar de los sos territorios, y tando presidíu pol hestóricu dirixente Belarmino Tomás.

Una propuesta paecía yá la presentare Andecha Astur l’añu pasáu, ensin que los partíos españoles s’ocuparen d’ella. Sicasí, tornamos presentala non sólo pola procedencia’l so conteníu, sinón porque paez que tán camudando les rellaciones ente partíos dientru la Xunta Xeneral, comu se percibe en declaraciones y movimientos qu’apunten a que Podemos taría interesao’n sofitar los prósimos presupuestos de PSOE-IU, convirtiéndose asina en collaboraor del gobiernu d’Adrián Barbón.

Si estos movimientos cuayen en daqué, sedría’l momentu afayaízu pa que tres partíos que se califiquen de progresistes y sensitibles pa con Asturies (PSOE, IU, Podemos) alcordaren aprebar colos presupuestos otres midíes, comu la oficialidá de la llingua d‘Asturies, o la reconocencia’l Conseyu Soberanu y la cellebración istitucional de la so declaración.

Creyemos que, 83 años dempués d’aquel momentu hestóricu, yá ye tiempu de que los partíos españoles dexen de ñegase a incluyir el Conseyu Soberanu y al presidente Belarmino Tomás na recostitución que se fae de la Memoria Hestórica d’Asturies, sólo por razones que resulten sectaries pal pueblu asturianu.

El garrapiellu midíes propuestes inclúi les que van darréu:

• Declarar el 24 d’agostu de ca añu comu fecha de cellebración istitucional pa remembrar la declaración del Conseyu Soberanu d’Asturies y Lleón
• Que la Xunta Xeneral convoque ca 24 d’agostu un Plenu estraordinariu, nelque se llea una remembranza de la declaración soberana d’Asturies.
• Que ca 24 d’agostu’l mobiliariu despachu de Belarmino Tomás seya treslladáu a la Xunta Xeneral, nuna xorná de puertes abiertes, permitiendo visitar el despachu del presidente Belarmino Tomás y l’edificiu de lo que debería ser l’ente representante d’una Asturies soberana.
• Que, comu complementu a la cellebración istitucional, s’alcuerden midíes que cinquen a la reconocencia y caltenimientu de la popularmente conocía comu Casa Blanca, asitiá na Plaza l’Istitutu (Xixón), que foi sé del Conseyu Soberanu d’Asturies y Lleón dende’l 24 d’agostu fasta’l 20 d’ochobre de 1937. Nesti sen la Xunta Xeneral pue:
  • Pidir a la Conseyería de Cultura que l’edificiu seya declaráu Bien d’Interés Cultural pol Gobiernu d’Asturies.
  • Precurar la conversión del edificiu en propiedá del Gobiernu d’Asturies, pol so indiscutible interés hestóricu.
  • Dotar al edificiu d’una placa que remembre que, en 1937, foi sé del Conseyu Soberanu d’Asturies y Lleón.
  • Proponer al Conceyu Xixón que se camude’l nome de la Plaza l’Istitutu pol de Plaza del Conseyu Soberanu d’Asturies y Lleón.
  • Collaborar col Conceyu Xixón pa colocar na plaza un monumentu que remembre’l sinificáu ya importancia del Conseyu Soberanu de 1937 na hestoria d’Asturies.

N’alcordanza de les muyeres y homes que’n 1937 defendieron Asturies y el nuesu drechu a decidir. ¡Puxa Asturies!