L’homenaxe en Tarna al Conseyu Soberanu d’Asturies y Llión, y a la so referencial Declaración de Soberanía frente a la República Española, tuvo la reclamación de la República Asturiana como principal protagonista.
La xornada entamó cola xubía a les trincheres de L’Abidular, onde l’exércitu del Conseyu Soberanu defendió Asturies frente al exércitu facista español, llantándose una asturina nel mesmu picu, n’alcordanza y homenaxe al compromisu d’aquellos homes y muyeres que dieron la so vida por caltener una Asturies llibre y soberana.
Darréu, yá nel Puertu Tarna, tuvo llugar l’actu políticu al delláu del monumentu n’alcordanza del Conseyu Soberanu, nel que se fixo la tradicional ofrenda floral, y onde intervino Mariu Arbesú recordando los principales fitos hestóricos d’aquella Declaración de Soberanía y l’enfotu del pueblu asturianu en defendela fasta les postreres consecuencies, reivindicando’l Conseyu Soberanu como la postrer istitución democrática asturiana, frente al “Principado” y l’Estatutu autonómicu que mos impunxeron dende Madrid ensin permitir a los asturianos votalu.
Na intervención defendió la necesidá de caltener la Memoria Hestórica del pueblu asturianu, y punxo en valor cómo foi Andecha Astur la que dende un entamu reivindicó esta parte fundamental de la hestoria asturiana, que’l PSOE ya IU siempres quinxeron caltener tapecía “y qu’agora intenten remanar, como fexo Adrián Barbón usando’l despachu de Belarmino Tomás pa entamar la so actividá como presidente del ‘Principado’, un remanamientu que por munchu que resulte ofensivu, supón un trunfu na llinia política d’Andecha Astur”.
Nesi sen, recordó qu’una alternativa de futuru comu ye Andecha Astur, tien la obligación de vindicar el pasáu, de recuperar la Memoria Hestórica. “Tamos n’un de los meyores momentos de la organización dende va munchu tiempu, y por eso mesmo tenemos más responsabilidá a la hora de vindicar la memoria de los nuesos güelos y bisagüelos, recuperala y saber integrala na dinámica d’anguañu, onde la llucha escontra la monarquía española y la defensa de la República Asturiana marquen agora mesmo l’axenda política asturiana, en bona midía gracies al llabor d’Andecha Astur”.
