Andecha Astur responsabiliza a Barbón de permitir un turismu descontroláu en plenu andanciu

Propón una Llei de Turismu Caltenible que sustituya la llei del PSOE d’hai 20 años

El Gobiernu d’Asturies ta acabante tomar decisiones qu’afeuten a la población del oriente’l país, en forma restriciones. Esti determín aporta sero, cuandu ta a piques de finar el mes d’agostu y los turistes tornen a los sos llugares d’orixe.

Andecha Astur vien proponiendo p’Asturies, dende fae años, enantes yá del andanciu, un turismu de calidá, afitáu nel respetu a la población llocal, al mediuambiente y a la identidá d’Asturies, poniendo en valor el fechu diferencial, afalando prestaciones d’alta calidá y fuxendo de la masificación.

Con andanciu o ensin elli, Asturies tien de fuxir del turismu de mases, agresivu haza’l mediuambiente, irrespetuosu cola nuesa forma vida, colos nuesos vezos y cola nuesa identidá.

Cola política turística que prauticó Barbón esti branu, Asturies perdió valor comu destín turísticu y marafundió bona parte de la imax de “paraísu natural” que viende’l propiu gobiernu. Atascos nos Picos d’Europa, descensos masivos del Sella con canoes, afluyencia descontrolao de xente en villes, pueblos y playes, 3500 visites diaries a los Llagos de Cuadonga (un negociu seguru que se regala a ALSA, poco interesá n’atender el tresporte diariu de los asturianos)…

Fináu’l branu, les consecuencies del turismu descontroláu y en condiciones sanitaries non segures recayen sobro la población llocal, que, dempués de nun poder esfrutar de les so playes, del so paisax o de la so hostelería, agora tien de sofrir les restriciones que siguen al descontrol turísticu.

Andecha Astur denuncia, nel aspeutu económicu, qu’esta política permisiva de Barbón non sólo representa pan pa güei y fame pa mañana, sinón qu’amás afala sólo un modelu d’economia costruyíu sobro la precariedá llaboral. Y, na estaya salú, consideramos qu’el Gobiernu de Barbón debería d’haber pesllao les llendes, pa torgar un espardimientu del virus que ye inevitable coles llendes abiertes ente comunidaes.

Les asturianes y asturianos queremos vivir, trabayar y esfrutar n’Asturies, d’un mou caltenible y equillibráu. Poro, el futuru d’Asturies nun ye ser el gran parque temáticu ñatural del Estáu español.

Asturies precisa desendolcar un turismu caltenible, de calidá, complementariu col restu de les actividaes económiques, non masificáu y respeutosu cola ñatura, la cultura y la identidá asturiana.

Y pa eso Andecha Astur afita qu’esiste una alternativa asturiana al turismu descontroláu del PSOE. Asina Andecha Astur defende la ellaboración d’una Llei de Turismu Caltenible, que sostituya a l’anticuá Llei 7/2001, de Turismu. Una nuea norma que, ente otros, tenga los siguientes oxetivos:

• Regular un impuestu del turismu caltenible, o ecotasa, que s’aplique a tou agospiamientu turísticu p’atender con ella los gastos públicos que xenera l’actividá d’esti seutor, comu se fae yá en munchos países europeos y en dellos territorios nel Estáu español.
• Dedicar los fondos recaudaos cola ecotasa a recuperar, rehabilitar y revalorizar espacios emblemáticos d’especial valor ambiental, hestóricu o cultural, a financiar actividaes rellacionaes cola diversificación del modelu económicu, a proyeutos de recuperanza del paisax agrariu, a proyeutos de formación, I+D+i y a proyeutos de transición enerxética.
• Evitar el turismu de mases, regulando un modelu turísticu compatible cola proteición del mediuambiente y respetuosu col modelu cultural asturianu y les formes tradicionales de vida y produción.
• Evitar la contaminación por residuos y la degradación paixaxística.
• Controlar tanto los alquileres illegales comu’l fraude fiscal nel seutor.
• Garantizar los dechos llaborales de les trabayaores del seutor, guetando un emplegu de calidá, torgando l’emplegu precariu, penalizando les xornaes llaborales irregulares y el cobru non regularizáu.
• Dotar l’alministración pública de direutrices ñidies pal control ya ispeición de les empreses del seutor, cuntanto pa ello con recursos homanos y materiales suficientes.
• Asegurar que l’actividá turístico nun mengua les posibilidaes de los asturianos d’algamar viviendes n’arriendu o propiedá en toles fasteres d’Asturies y en condiciones económiques afayaíces, controlando especialmente la densidá de pisos turísticos nos barrios y afitando llímites nel preciu los arriendos.
• Empareyar les polítiques rellacionaes col turismu con aquelles otres qu’afalen el comerciu llocal y el consumu de productos asturianos.
• Promover na actividá turística midíes pa la conocencia de la llingua y cultura d’Asturies.
• Concentrar les aídes al seutor turísticu nes pequeñes y medianes empreses, en cuenta financiar les grandes corporaciones.