Propuesta d’Ecotasa y Turismu Caltenible

Andecha Astur ta acabante presentar en toles Cases Conceyu d’Asturies una propuesta resolución del Plenu Municipal, pa que pidan al Gobiernu Asturianu la tramitación urxente d’una Llei de Turismu Caltenible, con ecotasa. Una nuea norma que, comu anunciemos hai poco, tendrá que sostituyir irremediablemente a la desfasá Llei 7/2001 de Turismu que firmare Tini Areces.

Asturies tien anguañu una valoración unánime: esti branu permitiómos comprebar que sofrimos un modelu de turismu masificáu y descontroláu, qu’afeuta bultablemente a los sirvicios públicos básicos que les Cases Conceyu ufren a la ciudadanía y al modelu de convivencia y sostenibilidá pol que trabayen nel so territoriu. Nin el propiu Gobiernu de Barbón pue ñegar esa rialidá, porque elli mesmu, tres decatase de qu’esti modelu turísticu, en plenu andanciu, taba poniendo en pelligru fasta la salú de la ciudadanía del Oriente asturianu, decidió poner n’allerta naranxa esa parte’l territoriu.

Sólo se pue revertir esta rialidá definiendo y normativizando un nueu modelu turísticu que…

• Corresponsabilice al turista cola prestación de sirvicios que se-y da y col caltenimientu de los bienes ñaturales, hestóricos y culturales de los qu’esfruta.
• Asegure la so compatibilidá col caltenimientu’l del mediuambiente, les actividaes tradicionales de produción y la identidá d’Asturies.
• Qu’afuxa de la cantidá pa facer atrayible la calidá.
• Que nun multiplique’l riesgu sanitariu de la población.
• Que garantice un turismu respetuosu colos usos y costumes de les asturianes y asturianos, que tenemos drechu a vivir, trabayar y esfrutar nel nuesu país.
• Que, mediante una ecotasa, permita amás meyorar les condiciones de vida de los habitantes de tolos conceyos asturianos.

D’ehí la importancia de la propuesta que presentemos a les Cases Conceyu, entitulá “Propuesta de Resolución sobro la necesidá d’una Llei de Turismu Caltenible que regule una ecotasa y un nueu modelu turísticu”.

Esta propuesta llama a les Cases Conceyu a defender una nuea Llei de Turismu Caltenible qu’incluya:

• La regulación d’un impuestu del turismu caltenible, o ecotasa, que s’aplique nes estancies turístiques p’atender con él los gastos públicos que xenera l’actividá d’esti seutor y que repercuta nes arques públiques del gobiernu asturianu y de los conceyos d’Asturies, comu se fae yá en munchos países europeos y en dellos territorios nel Estáu español.
• El compromisu de dedicar los fondos recaudaos cola ecotasa a recuperar, rehabilitar y revalorizar espacios emblemáticos d’especial valor ambiental, hestóricu o cultural, a financiar actividaes rellacionaes cola diversificación del modelu económicu, a proyeutos de recuperanza del paisax agrariu, a proyeutos de formación, I+D+i y a proyeutos de transición enerxética.

Y que debería tener, ente otros, los siguientes oxetivos:

• Evitar el turismu de mases, regulando un modelu turísticu compatible cola proteición del mediuambiente y respetuosu col modelu cultural asturianu y les formes tradicionales de vida y produción.
• Evitar la contaminación por residuos y la degradación paixaxística.
• Controlar tanto los alquileres illegales comu’l fraude fiscal nel seutor.
• Garantizar los dechos llaborales de los y les trabayaores del seutor, guetando un emplegu de calidá, torgando l’emplegu precariu, penalizando les xornaes llaborales irregulares y el cobru non regularizáu.
• Dotar l’alministración pública de direutrices ñidies pal control ya ispeición de les empreses del seutor, cuntanto pa ello con recursos homanos y materiales suficientes.
• Asegurar que l’actividá turística nun mengua les posibilidaes de los asturianos d’algamar viviendes n’arriendu o propiedá en toles fasteres d’Asturies y en condiciones económiques afayaíces, controlando especialmente la densidá de pisos turísticos nos barrios y afitando llímites nel preciu los arriendos.
• Empareyar les polítiques rellacionaes col turismu con aquelles otres qu’afalen el comerciu llocal y el consumu de productos asturianos.
• Promover na actividá turística midíes pa la conocencia de la llingua y cultura d’Asturies.
• Concentrar les aídes al seutor turísticu nes pequeñes y medianes empreses, en cuenta financiar les grandes corporaciones.

Una Llei de Turismu Caltenible ye güei un oxetivu social y políticu tan necesariu comu asumíu pola ciudadanía. Si nun se llogró pal branu de 2021, el PSOE y les fuercies que lu curien nel gobiernu tendrán munches coses que xustificar públicamente, si puen.