La Dellegación del Gobiernu Español recurre a midíes policiales descomanaes pa defender la “Fundación Princesa” a costa de llimitar el drechu los asturianos a manifestase.
Andecha Astur, xunto coles organizaciones antimonárquiques que mos cordinamos na plataforma “Asturies nun tien rei”, convocó ayeri una concentración escontra los Borbones, que ficimos n’Uviéu, énte la sé de la “Fundación Princesa de Asturias”.
La concentración féxose magar que la Dellegación del Gobiernu español decidió emplegar bien la so policía pa intentar que l’actu nun se cellebrare. Denunciamos la represión política que supón una presencia descomaná d’efeutivos policiales, les sos maneres tosques y antidemocrátiques de dirixise a los concentraos y la identificación masiva de los asistentes.
Sicasí, la concentración cellebróse cola pancarta que mos xustifica, “Asturies nun tien rei”, y lleóse ellí’l documentu consensuáu ente toles organizaciones mentantu una muria d’efeutivos policiales perprotexía la puerte d’acesu a la “Fundación Princesa de Asturias”.
Andecha Astur denuncia que, mentantu se pudieron facer ensin una gran presión policial dos concentraciones en Xixón (Náuticu y Avenida Juan Carlos I), el Gobiernu español amuesa’l so firme determín de protexer los preseos de xustificación ideolóxica y simbólica que tien pa defender n’Asturies la dinastía franquista y lladrona de los Borbones, y ehí xuega un papel cimeru la defensa que faen de la “Fundación Princesa de Asturias”.
Tomamos nota de que avanzamos pel bon camín. Pernotóse qu’al Estáu español duel-y enforma que dixebraes organizaciones asturianes de trabayaores, mocedá y republicanos en xeneral seyan capaces de dar una rempuesta sostenía nel tiempu a un Estáu español que mos oprime y nun mos representa.
Pa que se conoza bien lo que la policía nun quería qu’escucharen les oreyes delicaes de los foncionarios bien pagaos de la “Fundación Princesa”, DEXAMOS EQUÍ’L TESTU QUE LLEÍMOS.
Señora Dellegá del Gobiernu español, señores súditos de la Fundación… ¡Asturies nun tien rei! ¡Camentamos resisitir!
