Irene Montero recurre al fechu de que nun ye una llingua oficial, lo que nun impide qu’esti sirviciu d’atención telefónica pa muyeres víctimes de violencia de xeneru almita 53 idiomes, de los que 49 tampocu nun son «oficiales» nel Estáu español.
Andecha Astur fexo una entruga parllamentaria nel Congresu los Diputaos al traviés del diputáu d’EH Bildu, Jon Iñarritu, de la coalición Agora Repúbliques, de la que formamos parte, pidiendo desplicaciones pola discriminación de les muyeres asturiano falantes a la hora d’aceder a esti serviciu a les muyeres víctimes de violencia de xéneru.
La rempuesta’l Gobiernu, al traviés del Ministeriu d’Igualdá ye un insultu a Asturies. Irene Montero afita que’l Conveniu européu so prevención y llucha escontra la violencia pa coles muyeres obliga a sofitales en llingües que pescancien. Pero que l’Estatutu d’Autonomía nun reconoz l’asturianu comu oficial. Entós que s’aplica a les asturianes l’artículu 3 de la Costitución: tienen la obligación de conocer l’español. De mou que les asturianes podrán usar el 016 sólo pa ser atendíes n’español o en dalguna de les otres 52 llingües.
Con esta rempuesta queda n’evidencia que más allá del posturéu, Podemos asume dende’l gobiernu col PSOE, la política de represión lligüística cola que los partíos españoles castiguen a Asturies dende siempres. Nun hai diferencies ente ellos.
Ello asina Andecha Astur, al traviés de la so coalición Agora Repúbliques, anuncia la prósima presentación d’entrugues al Gobiernu español pa forcialu a reconocer los drechos llingüísticos de les asturianes nel furrulamientu del 016.
