La Xunta Xeneral almite a trámite la propuesta d’Andecha Astur pa cellebrar istitucionalmente la declaración del Conseyu Soberanu d’Asturies y Lleón

Ello pon a PSOE, Podemos ya IU na tesitura de cumplir coles sos declaraciones a favor de la Memoria Hestórica d’Asturies, o retratase y quedar de nueu n’evidencia

N’agostu Andecha Astur propunxo a la Xunta Xeneral l’aprebación d’un conxuntu iniciatives pa cellebrar istitucionalmente que na nuechi del 24 d’agostu de 1937 el Conseyu Interprovincial d’Asturies y Lleón, presidíu pol hestóricu dirixente Belarmino Tomás, determinó costituyise en Conseyu Soberanu d’Asturies y Lleón, asumiendo plena xurisdición y responsabilidá nel gobiernu civil y militar de los sos territorios, lo que ye propiamente una declaración d’independencia.

Agora la Presidencia de la Xunta Xeneral almite a trámite la propuesta y treslládala a los grupos parllamentarios. Éstos tienen dos ociones: inorar la inclusión istitucional del 24 d’agostu na Memoria Hestórica d’Asturies o asumir la propuesta y llevala a debate y votación nun Plenu.

Ye una bona ocasión pa que la esquierda española, si acobarda, amuese una vegá más les sos contradiciones, coles que nun puen ufrir dengún futuru p’Asturies.

Ehí ta un presidente Barbón que bixordea de tener en Presidencia’l despachu de Belarmino Tomás y d’usalu pa firmar documentos. Pero ¿tendrá la dinidá de reconocer, comu se debe nesti país, el llabor bramente socialista y soberanu que protagonizó Belarmino Tomás?

Ehí ta una Izquierda Unida que se diz hermana de tolos movimientos memorialistes. ¿Pero sedrá capaz de contener el so españolismu pa defender que Belarmino y el so Conseyu Soberanu merecen un sitiu na Memoria Hestórica d’Asturies y una reconocencia oficial?

Ehí ta un Podemos que, magar que los sos cabezaleros son ministros del rei, diz surdir del fervor republicanista. ¿Pero tornará castigar a los asturianos ñegándomos la nuesa Memoria Hestórica?

La propuesta d’Andecha Astur tien la virtú de poner en valor la hestoria d’Asturies y reconocer l’honor d’aquelles xeneraciones d’asturianes y asturianos que defendieron una Asturies socialista y soberana. Pero tamién tien la utilidá de sirvir pa retratar, si quieren dexase, a los grupos parllamentarios que na Xunta Xeneral nun tan sirviendo a Asturies, sinón defendiendo ensin más la estabilidá del réxime franquista y corrutu que representa la monarquía de los Borbones.

Tola Asturies moza, tola Asturies obrera, tola Asturies dinámica qu’anguañu caltién plataformes comu “Asturies nun tien rei”, tendrá nesta propuesta d’Andecha Astur la oportunidá de ver cómu se pue defender el futuru d’Asturies dende fora les istituciones y cómu se pue trabayar a la escontra dende dientru d’elles. Aprofitemos pa tomar bona nota.