El manifestamientu en refuga a los «Premios Princesa» tornó a dexar nidio qu’Asturies nun ye esi «Principado» servil que mos impunxeron dende Madrid, qu’Asturies Nun Tien Rei, y sí un Pueblu vivu que nin se rinde nin s’apanda
¡Asturianes, asturianos, antimonárquicos de cualisquier orixe y condición… bienveníos toos a esta Plaza de La Escandalera! Con estes pallabres recibíase al manifestamientu que saliendo de les escaleres del Milán percorrió Uviéu fasta esta plaza, baxo un terriu control policial y una llimitación del percorríu col que pretendió ocultase la rempuesta popular frente a la enfrenta que representen los «Premios Princesa» pal Pueblu Asturianu.
Na intervención política que fexo Mariu Arbesú féxose un repasu a lo que ye la monarquía y lo que foi la transición, y les sos implicaciones na Asturies d’anguañu, denunciando espresamente’l financiamientu públicu de la fundación promonárquica que promueve estos premios, y desixendo finar con esa práutica –talo como fexo Andecha Astur presentando una riestra propuestes nel Congresu, Xunta Xeneral y Cases Conceyu-, afitando tamién que: «Vemos con claridá cómu la monarquía nun tien llendes polítiques, llegales nin étiques nel so enfotu por arriquecer y perpetuase. Y cómu la casta político qu’ocupa les istituciones de gobiernu y representación defende esa monarquía española, cohabitando con ella nes mesmes condiciones d’indinidá y corrución.
Asina ye que’l sistema políticu español nun-y sirve a Asturies, nun-y sirve a les trabayaores. La monarquía española, la so Costitución, el so Gobiernu, el so Congresu, el so Senáu, el so Estatutu d’Autonomía y la so Xunta Xeneral del “Principado” nun mos representen»
La intervención política finó faciendo referencia a la necesidá de trabayar a comuña nun proyeutu común que dea rempuesta a les necesidaes del nuesu pueblu »
«Asturies nun tien rei. Asturies nun tien princesa.
Asturies tien trabayaores esplotaos, xente en paru, ciudadanes y ciudadanos con drechos amenorgaos, población con necesidaes básiques ensin cubrir, compatriotes emigraos a la fuercia, una identidá propia por reconocer, un proyeutu de llibertá por costruyir ente toes y toos.
Ye tiempu de xuntances. Ye tiempu de trabayar a comuña por desaniciar el mal que mos ataca comu Pueblu y comu clas trabayaora»
Una vuelta más quedó nidio qu’Asturies nun ye esa tierra conquistada y sumisa que pretenden, y munchu mesnos esi «Principado» que mos impunxeron dende Madrid, sinon un Pueblu vivu, dimpuestu a defender los sos drechos ya identidá, que nin se rinde nin apanda.
La rempuesta, entamada por Andecha Astur conxuntamente con estremaes organizaciones antimonárquiques ye la continuación a les que vienen teniendo llugar nos tiempos caberos frente a la monarquía española, y qu’espeya como la capacidá d’entendimientu ente formaciones polítiques y sociales d’estremaes idioloxíes y práutiques polítiques ye posible y eficaz a la hora de dar puxu a la nuesa capacidá d’organización y rempuesta, marcando una llinia d’actividá esitosa que de xuru dirá ampliándose con nuevos oxetivos ya incorporaciones.
