¡Asturianes, asturianos, antimonárquicos de cualisquier orixe y condición… bienveníos toos a esta Plaza de La Escandalera!
Bienveníos porque tais faciendo ocupación popular d’un llugar, equí, ente’l Teatru Campoamor, onde añalmente la familia Borbón, l’IBEX 35 y otres corporaciones multimillonaries vienen a escenificar capítulos sucesivos del so blanquiamientu, a amosar una cara amable de la monarquía énte la población al traviés de la cultura, el deporte o la cencia.
La Monarquía borbónica atópase na mayor cris de la so hestoria, abellugá nun Estáu antidemocráticu herederu del franquismu, que mos ñega los drechos y les llibertaes más fundamentales. Tolos gobiernos qu’hebio fasta agora escaécense de qu’equí la democracia foi arrasá con una guerra civil polos mesmos que güei viven del nuesu mugor y los nuesos impuestos.
Ye equí onde vienen a texer un discursu facista pol qu’Asturies ye’l so “Principado”, los sos fíos apaecen comu los nuesos príncipes y la clas trabayaora, toa, comu súdita.
¡40 años! ¿A qué suena la cifra de 40 años n’Asturies? Suena a la duración d’una dictaúra, ¿verdá? Pos nun falamos de la de Franco, sinón de la de los sos sucesores.
Hai 40 años que los Borbones y l’Estáu español crearon n’Asturies la Fundación Princesa. Y ellos mesmos dixeron pa qué nos sos estatutos: el so principal oxetivu ye fortalecer vínculos ente Asturies y “el títulu que tradicionalmente ostenten los herederos de la Corona d’España”.
Dedíquense a crear esi vínculu porque, en rialidá, nun esiste. Asturies nun tien rei, Asturies nun tien princesa.
Una Fundación que pa intentar someter Asturies ingresa ca añu más de 5 millones y mediu d’euros.
Y que ca añu recibe del Gobiernu español 300.000 €. Ye dicir, que nos caberos años esti Gobiernu español tan progresista que tenemos y los anteriores del PP diéron-y a la Fundación más de 2 millones €. Too a mayor honor y gloria de la princesa Leonor, heredera de Felipe VI, herederu del Rei Fuxíu, herederu del mesmísimu Franco.
Un gobiernu del PSOE-Unidas Podemos que sigue condergando y calteniendo ente rexes a cientos de políticos antifacistes, independentistes, comunistes y anarquistes, munchos d’ellos con graves malures y condergaos dalgunos a una caena perpetua tapecía. Por nun falar de cómu tán xorreciendo los mecanismos represivos, xubiendo’l sueldu un 20% a los cuerpos policiales, mentantu nun se contrata’l presonal mélicu necesariu nun andanciu, mentantu derrochen miles de millones n’armamentu militar, tanques y misiles.
Amás, gúei tócamos falar d’otru presu políticu, Dani Gallardo, que cumple un añu en prisión preventivo por un montax policial, pol solu fechu de dir a una concentración en solidaridá col pueblu catalán. ¿Cómu se pue nin siquier plantegar qu’ésti ye un gobiernu de progresu cuandu perpetúa la mesma represión político que los anteriores? Son parte de problema y, comu talo, tenemos de combatilos.
¿Por qué esos esfuercios y esi gastu de presupuestos n’Asturies por parte la Fundación Princesa?
Porque, en rialidá ellos saben y nosotros sabemos qu’Asturies nun ye súdita, el nuesu pueblu nin ye, nin quier ser vasallu de naide. Somos un Pueblu Trabayador con dinidá.
La mesma dinidá qu’amuesa la plantía de la Sanidá Pública que refugó recoyer esi premiu principiegu emporcáu de represión, corrución y franquismu.
La mesma dinidá qu’amuesa la plantía del ALSA. Y la de Vauste. Y la de Vesuvius. Y la d’Alu Ibérica. Y la d’Alimerka. Y la Plataforma d’Ausiliares d’Aída a Domiciliu. La mesma dignidá qu’amuesen les paraes y paraos, los pensionistes, la xente que vive y trabaya en precario, los enfermos y enfermes desatendíes, la mocedá que se vio obligao a emigrar, los asesinaos anónimos de fueses y cunetes, les muyeres vítimes del patriarcáu, los discriminaos por razones de sexu, raza o idioma, los que caltienen l’Asturies de produción tradicional, los vecinos solitarios de los pueblos…
¡Éses sí! ¡Eses son les persones que-y dan dinidá y caltienen viva Asturies y arguyosu a esti Pueblu!
Un Pueblu que, comu’l nuesu, tien llarga tradición obrera, militante y revolucionaria nun va permanecer pasivu nestos tiempos.
Nun va aceutar les rempuestes conformistes, nin les reformistes, nin el collaboracionismu cómpliz de la socialdemocracia española.
Un Pueblu comu’l nuesu tien de xenerar una rempuesta potente, continuá y xunitaria, xunto colos demás pueblos trabayaores del Estáu, énte la monarquía y l’estáu autoritariu y represivu.
Nel so intentu inútil por llograr una Asturies servil y monárquica, la Fundación Princesa axunta nel so interior toa clas d’enemigos del pueblu trabayaor. Ehí ta’l so Patronatu compuestu por grandes corporaciones bancaries ya empresariales, comu Arcelor Mittal, BBVA, Bancu Sabadell, Corporación Masaveu, Abengoa, Liberbank, Hidroellétrica’l Cantábricu, Alsa, Bancu Santander, Corporación VIPS-Sigla, etc.
Toes elles son corporaciones multimillonaries que, amás d’arriquecese con hores interminables y precaries del nuesu trabayu pagáu con salarios míseres, evaden impuestos en paraísos fiscales qu’algamen más de 250.000 millones €. Son les rentes del trabayu les que caltienen el gastu l’Estáu y ésti, en cuanta tornalo en drechos sociales y sirvicios públicos pa la clas trabayaora, destínalo a istituciones comu la Monarquía o al rescate d’empreses y bancos, comu asocedió na cris de 2008.
Poro, dicimos… ¡ditaúra!, porque’n cuenta d’invertir en sanidá, educación, pensiones, residencies o otros sirvicios fundamentales que necesita la clas trabayaora, inviértese en caltener y salvar el capitalismu.
Con unos sirvicios públicos fuertes la cris sanitario nun prevocare tantes muertes y el caos que carecemos pola pésima xestión d’esti gobiernu, que nin siquier nesta cris apostó decidíamente por fortalecer lo público, a la escontra, sigue salvando a los mesmos que prevocaron esta situación d’anguañu. Porque la cris sanitario y l’andanciu nun tien componentes esternos, sinón intrínsecos a esti sistema qu’arrasa la ñatura cola perda la biodiversidá, sobroesplota la tierra cola agroindustria intensivo y mos ta condergando a la desapaición a curtiu plazu.
Porque vemos con claridá que l’allianza ente’l gran capital y la monarquía sirve pa reconvertir la figura de trabayaor na d’esclavu de contratu temporal, sirve pa reducir los sueldos medios a pagues menguaes que faen imposible cualisquier proyeutu vital, y sirve pa reducir la condición de ciudadanu llibre a la de siervu’l sistema.
Vemos con claridá cómu la monarquía nun tien llendes polítiques, llegales nin étiques nel so enfotu por arriquecer y perpetuase. Y cómu la casta político qu’ocupa les istituciones de gobiernu y representación defende esa monarquía española, cohabitando con ella nes mesmes condiciones d’indinidá y corrución.
Asina ye que’l sistema políticu español nun-y sirve a Asturies, nun-y sirve a les trabayaores. La monarquía española, la so Costitución, el so Gobiernu, el so Congresu, el so Senáu, el so Estatutu d’Autonomía y la so Xunta Xeneral del “Principado” nun mos representen.
Por eso tenemos claro qu’Asturies nun tien rei.
Porque la corona española y el réxime políticu qu’heredaron de Franco son tolo contrario a lo que deseyamos p’Asturies, pa la clas trabayaora y pa les nueses fíes y fíos, pa los que naguamos por un país de llibertá, de xusticia social, d’igualdá, de trabayu dinu, de soberanía popular… que respete dafechu la identidá de les presones y del nuesu mesmu Pueblu.
Yá lo dicía Francisco Morazán, xeneral y políticu hondureñu, a caballu ente los sieglos XVIII y XIX: “Pa desaniciar el mal de les naciones ye mester destruyir les monarquíes”. Nel Estáu español finar cola so monarquía ye acabar col réxime posfranquista ñacíu cola Costitución de 1978. Ye consiguir la xusta llibertá de los Pueblos y de la clas trabayaora.
Con esi oxetivu, col de destruyir la monarquía, símbolu y piedra clave del sistema capitalista que mos explota y oprime, facemos un llamáu a les asturianes y asturianos. Un llamáu pa organizase, pa comprometese, pa militar, pa nun callar, pa dar la cara… ente los usos y abusos d’esti sistema corrutu que mos esplota.
Porque nun ye posible tar quietu y calláu cuandu ves les consecuencies de que’l facismu español resolviere’n 1975 la so cris de modelu d’Estáu colocando comu herederu a un rei Borbón. Nin cuandu ves que l’Estáu español torna resolver en 2014 la so cris xubilando honrosamente a Juan Carlos I y coronando a Felipe VI, otra caña del mesmu árbol podre, que tomó posesión agradeciendo “el reináu esceicional del rei Juan Carlos I” y calificándolu de “llegáu políticu estraordinariu”.
Nun ye posible tar quietos y callaos cuandu la ciudadanía d’a pie, toes y toos nosotros, tenemos la obligación de pagar tolos años a un rei cuasi 8 millones € pa que se mantenga. Ye dicir, que mos obliguen a da-y cuasi 600 salarios mínimos interprofesionales, 600 salarios. Más lo que la Casa Rial saca de tráficu d’influyencies, de publicidá, de comisiones, de fraudes fiscales… Pa que se mantenga, pa que mos diga qu’anque robe ye superior a nós, pa que tresmita’l poder por herencia, pa qu’adormeza y desactive respuestes sociales, pa que xustifique la esplotación capitalista y la desigualdá, pa que perpetúe la xerarquía social y l’imperiu militar. Pa que, en fin, mos fuercie a ser ciudadanes y ciudadanos sometíos a un réxime monárquicu y español.
Mentantu mos quede una gota sangre en circulación, nun mos permitiremos ser cómplices por silenciu o inación d’esti réxime esplotaor. La única igua ye dexar atrás esti réxime y costruyir un sistema que garantice una vida digna a tolos pueblos del Estáu. La igua nun pasa por votar ca cuatru años pa tener un recambiu de gobiernu que siga xestionando los intereses del capital, sinón por un cambiu d’Estáu frutu del desenrollu d’un procesu revolucionariu que lleve a la clas obrera a la toma’l poder políticu. P’algamar esa meta la movilización, la organización y la llucha consecuente nuna mesma direición son elementos imprescindibles.
Asturies nun tien rei. Asturies nun tien princesa.
Asturies tien trabayaores esplotaos, xente en paru, ciudadanes y ciudadanos con drechos amenorgaos, población con necesidaes básiques ensin cubrir, compatriotes emigraos a la fuercia, una identidá propia por reconocer, un proyeutu de llibertá por costruyir ente toes y toos.
Ye tiempu de xuntances. Ye tiempu de trabayar a comuña por desaniciar el mal que mos ataca comu Pueblu y comu clas trabayaora. Y pa eso, comu dixo Francisco Morazán, ye mester destruyir esta monarquía. Xuntes y xuntos. Con persistencia. Con atrevimientu. Con orixinalidá. Con puxu.
Sigamos xuníos nesti camín d’enfotos populares comunes y de lliberación.
¡Muerra la monarquía!
¡Puxa Asturies!
¡Puxa la llucha de la clas obrera!
