Nun tamos falando de cualisquier tontería, falamos del archivu más importante de cultura oral y popular y de padremuñu inmaterial recoyíu del Estáu, consideráu como ún de los más nutríos, sistemáticos y relevantes de los qu’esisten n’Europa y nel mundiu. Falamos de más de mil hores de grabaciones n’audiu y vidiu, una coleición inxente de semeyes recoyíes nos caberos trenta años, más de 30.000 rexistros de lliteratura oral y testimonios históricos inremplazables. La hestoria y cultura d’Asturies nos sieglos caberos cuntada polos sos protagonistes.
El “Principado” entamó prebando col so avezáu sistema pa esborriar cualisquier niciu d’identidá asturiana: inorando l’archivu, apurriendo nulu sofitu económicu o profesional pal so desendolcu, desentendiéndose d’ello, comu se desentiende de les cabanes de teitu, la llingua, el prerrománicu o los horros y paneres, a ver si dexándolo baltar va escaeciéndose. Sicasí, l’enfotu de munchos particulares ya’l tenaz enfotu del so creador, Jesús Suárez López, forció l’aniciu d’una Cátedra dedicada a esti archivu na Universidá d’Uviéu, financiada pola Caxa Rural. Menos d’un añu más tarde anunciase la “cesión” de tou esti material a la Universidá de México, nun espoliu cultural ensin precedentes, tanto por ser d’un país sudamericanu a un europeu, como pol consentimientu esplícitu de l’alministración del país víctima. Nun ye casual.
México garantiza que la información nun seya acesible polos asturianos, nin siquiera pa los investigadores, restrinxendo’l so acesu a los investigadores de la Universidá Autónoma de México y de les istituciones que formen parte de la Rede Iberoamericana d’Estudios sobro Materiales Orales. Asina España pue tar tranquila, los asturianos seguirán perdiendo los sos raigaños y les fontes más fiables de los fechos históricos de los caberos años, porque l’Archivu inclúi una amplísima gama de testimonios d’hestoria oral rellativos a la emigración asturiana, Ochobre del 34, la Guerra Civil cola represión de la posguerra, los “neños de la guerra” na Unión Soviética, los vezos de la vida asturiana nel sieglu ya encluso nos sieglos pasaos… L’Archivu de la Tradición Oral Asturiana facía imposible siguir negando la llingua y la identidá propia de los asturianos, asina qu’ante la imposibilidá de desfacese d’ella unvíenla lo más lloñe posible.
