Xosé Lluis García Arias ye’l candidatu d’Andecha Astur al premiu Pegollu, y Adrián Barbón ye propuestu comu candidatu a la Madreña de purpurina.
Nesta XXXVI ecidión de los Premios Andrés Solar, entamaos pola Xunta pola Defensa de la Llingua Asturiana, colod qu’esta organización fai por algamar la oficialidá de la llingua d’Asturies y caltener viva la memoria d’aquel collaciu y gran poeta asturianu al que-y pruyía “un pueblu llibre y una Asturies dixebrá”.
Andecha Astur propón comu cantidatu al Pegollu na XXXVI convocatoria de los Premios Andrés Solar a don Xosé Lluis García Arias. Ente asturianos nun fai falta señalar los méritos indiscutibles que convierten a García Arias nesa presona a la qu’Asturies tanto-y debe; abasta señalar la so condición de reconocíu filólogu y profesor, autor d’obres fondamentales na normalización de la nuesa llingua, fundaor y primer presidente de Conceyu Bable y presidente de l’Academia de la Llingua Asturiana dende’l so entamu en 1981 fasta 2001.
Andecha Astur propón comu cantidatu a la Madreña de purpurina na XXXVI convocatoria de los Premios Andrés Solar a don Adrián Barbón Rodríguez, secretariu xeneral de la FSA-PSOE y presidente del Gobiernu d’Asturies. Creyemos que tamién ente asturianos son enforma conocíos los méritos d’esti candidatu pa tan penosa distinción. Sicasí, podemos remembrar la so defensa teórica y valera de la oficialidá del asturianu nel caberu congresu la FSA, los nulos avances en materia d’oficialidá, escolarización y normalización llingüística que se dieron nel tiempu que lleva na presidencia, asina comu la cabera homildación con que castigó a tol Pueblu Asturianu, cuandu comunicó al grupu de Ciudadanos na Xunta Xeneral que’l Gobiernu que preside renuncia a tratar la custión de la oficialidá nel añu 2021. Tres 40 años de gobiernos del PSOE que torgaron la llingua’l nuesu país, con Adrián Barbón la rialidá llingüística d’Asturies nun camudó un res.
Andecha Astur espera que seyan tomaes en consideranza les razones de pesu que sofiten estes dos candidatures, asina comu’l fechu de que nun respuenden sólo al sintir de la nuesa organización, sinón que se fexo l’esfuerciu previu de contrastar n’estremaos ámbetos de la sociedá asturiana’l so xacíu, atopando una acoyía bien favoratible a les mesmes.
