Que siga alantre depende agora de los Grupos Parllamentarios presentes na Xunta Xeneral
La Presidencia de la Xunta Xeneral notificó a Andecha Astur l’almisión a trámite de la so propuesta a que s’aprebe una resolución que suponga l’acabu les sovenciones que la Xunta Xeneral y el Gobiernu d’Asturies dan añalmente a la Fundación Princesa; procediendo al treslláu de la mesma a los Grupos Parllamentarios.
El progresu de la propuesta en sí, depende en principiu de que dalgún de los Grupos Parllamentarios l’asuma y la defenda, lo que nun paez demasiadamente probable si tenemos en cuenta que, posturéu aparte, dengún de los grupos parllamentarios presentes na Xunta Xeneral vien tomando denguna iniciativa nesi sen, y paez difícil qu’asuman una propuesta tan concreta como la fecha por Andecha Astur.
Nun ye la primer vegada que propuestes d’Andecha Astur son almitíes pola Presidencia de la Xunta Xeneral, y se-yos da treslláu a los Grupos Parllamentarios, pero fasta agora estos grupos vienen faciendo’l vacíu a diches propuestes, como ye’l casu de l’anterior na que se pidía cellebrar istitucionalmente la declaración del Conseyu Soberanu d’Asturies y Lleón; lo que pon n’evidencia’l posturéu d’aquellos grupos que caltienen posicionamientos públicos nesi sen, pero que nin tienen iniciatives polítiques consecuentes, nin asumen les de los demás cuando les faen.
Nesti casu concretu, pesia les declaraciones republicanistes de grupos parllamentarios como Podemos o IU, lo cierto ye que dende Andecha Astur tampoco nun s’espera dengún sofitu de los mesmos a esta propuesta.
Sicasí, caltiense la necesidá de d’esta triba d’iniciatives pa dexar nidio qu’hai otres formes de faer política, y poner n’evidencia a esos grupos parllamentarios cuya práutica política tien pocu que ver cola imaxe qu’intenten tresmitir mediáticamente.
