Andecha Astur propón incluyir midíes de Proteición Social nos presupuestos del «Principado»

Les propuestes presentaes  na Xunta Xeneral fainse énte l’agravimentu de la situación de probitú prevocáu poles polítiques del Estáu español p’Asturies, empeoraes entá pol andanciu del Covid-19 y la so xestión

L’escritu presentáu fundaméntse nos datos de la European Anti-Poverty Network (EAPN)* ye una plataforma europea d’entidaes sociales que trabaya y llucha escontra la probitú y la esclusión social nos países miembros de la Xunión Europea, que recueye nel so postrer informe qu’Asturies ye más probe que nunca, y eso que yá enantes del andanciu tenía la tasa de probitú más alta dende que se recueyen rexistros oficiales. Esti informe asitía Asturies comu la fastera con mayor tasa de probitú severo del Estáu.

Nel añu 2019 la tasa de probitú xubió n’Asturies un 57%, algamando a cuasi una de ca cuatru presones: “El pior desendolcu de cualisquier comunidá na postrer década”, según l’informe. En datos: al empiezu de 2019 había 251.863 asturianos y asturianes en situación de probeza y riesgu d’esclusión social.

L’informe afita que la creación d’emplegu por si sola nun va iguar la situación, porque l’altísima precariedá llaboral que se carez nel país permite simultaniar probeza y trabayu. Dao que los datos son anteriores a la cris sanitario que se ta careciendo, nun pue culpase a la mesma de la llaceriosa situación na que s’alcuentra’l país, teniendo que guetar les responsabilidaes n’aquellos dirixentes y xestores públicos qu’implementaron les polítiques económiques, llaborales y sociales que llevaron a Asturies a pasar de ser una de les fasteres más prometedores d’Europa a ser el país con mayor tasa de presones en situación de probitú severo.

Poro, ye urxente que’l Gobiernu asturianu ponga en marcha una braera política de proteición social, que seya prioritaria, que sirva pa xenerar texíu económicu y que ponga remediu a la doliosa ya inxusta situación que se denuncia. Si esto enantes del andanciu yá yera necesario, agora mesmo ye urxente ya imprescindible.

Ello asina, Andecha Astur presenta una propuesta pa modificar los Presupuestos Xenerales d’Asturies pal añu 2021 faciendo incluyan partíes económiques específiques que permitan defender los criterios ya implementar les midíes que, en materia de política social, se rellacionen darréu.

PROPUESTA DE CRITERIOS Y MIDÍES NEL ÁMBETU SOCIAL NA PREPARACIÓN DE LOS PRESUPUESTOS XENERALES D’ASTURIES PAL AÑU 2021

• Reorientar toles polítiques sociales públiques pa sostituyir la so visión asistencialista pola prioridá del acompangamientu, el siguimientu y la inclusión rellacional y sociollaboral.
• Una política d’aídes sociales diseñá específicamente pa compensar el ñidiu sesgu social que tien l’andanciu.
• Moratoria nel pagu de suministros básicos nos domicilios (agua, gas, lletricidá…).
• Moratoria nel pagu de sirvicios básicos de la vivienda (basoria, alcantarilláu…).
• Camudu na regulación del IBI, fixanto una tasa especial pa viviendes de luxu, otra pa viviendes vacíes y regulando la esención de tases nel casu de viviendes con titulares en situación de precariedá, riesgu de probitú o riesgu d’esclusión.
• Paralización de los desfiucies mentantu persista l’andanciu.
• Entamar un parque públicu de vivienda per conceyos, destináu al arriendu con criterios de sofitu ya inclusión social.
• Posibilidá de solicitar l’anulación del pagu d’autónomos ya impuestos pa les PYMES afeutaes polos preslles.
• Camudu del calendariu fiscal d’impuestos y tases públiques, a nivel nacional asturianu y de conceyu, estableciendo facilidaes y bonificaciones pal presonal autónomu y pa los seutores de comerciu y hostelería, ente otros.
• Regular los arriendos de llocales al pequeñu comerciu y la hostelería, fixando tanto topes comu midíes compensatories en casu de ceses d’actividá por motivos sanitarios o asemeyaos.
• Entamar un Sirviciu Públicu Asturianu de Curiaos Universales que garantice a la población curiaos en casu de necesidades básiques d’atención presonal, yá seyan motivaes por razones d’edá, movilidá, salú, autonomía presonal, situación sociollaboral, probeza, esclusión social, solitú, etc., que collabore cola rede ciudadana que fonciona autónomamente nel ámbetu del sofitu solidariu.
• Garantizar l’atención a domiciliu de les presones, dependientes o independientes, d’altu riesgu.
• Meyorar l’atención en salú mental p’atender les consecuencies sicolóxiques de la cris.
• Dedicación prioritaria de los Sirvicios Sociales públicos na identificación de presones en situación de necesidá, solitú, en riesgu o situación d’esclusión social.
• Entamu d’un teléfonu públicu d’atención social.
• Preparar el sistema educativu pa que la fienda teunolóxica nun perxudique a la reciella más desfavorecío.
• Aídes publiques pa los seutores productivos propios y prioridá pa los productos asturianos nes grandes superficies comerciales.
• Entamu d’una sociedá mercantil pública p’afalar la producción, l’asociacionismu productores y el consumu asturianu, con plataforma dixital pal comerciu direutu de productos asturianos y un alcuerdu pal tresporte mercancíes.

 N’Uviéu, a 29 de payares de 2020.

* Nel Estáu español la Rede de Llucha escontra la Probeza y la Esclusión Social (EAPN-ES) ye una muerganización horizontal, plural ya independiente que trabaya nesta tema nel ámbetu l’Estáu. Anguañu ta encadarmá por 18 redes territoriales y 18 entidaes d’ámbetu estatal, pero asocia en tol Estáu a más de 8.000 entidaes sociales.

Col finxu d’ufrir una radiografía actualizá del impautu la probitú y la esclusión social nel Estáu español y nes naciones qu’ésti domina, EAPN-ES ellaboró l’informe entituláu “L’Estáu la Probitú. España 2020. X Informe añal sol riesgu de probeza y esclusión”.